Райсомæй куыстмæ тагъд кæнгæйæ, алчидæр фæтæрсы, маршрутон такситы æмæ автобусты бынæттæ куы нал уа, уымæй.
Беслæны цæрджытæ тынг цин кодтой æхсæнадон транспорты маршруттыл такситæ кусын кæй райдыдтой, ууыл. Туман бафидгæйæ иу алкæй бон дæр уыд æнæкъуылымпыйæ куыстмæ афоныл бахæццæ уæвын.
Ахæм таксийыл Æлдаттаты Сослан кусы 4 азы. Растдæр, зæгъгæйæ, та куыста. Уымæн æмæ сын 2 мæйы размæ сæ куыст баурæдтой. Ныр таксисттæ тыхсынц æгуыстæй кæй баззадысты, уымæй.
Æлдаттаты Сослан, æхсæнадон таксийыл кусæг: «Куысты бынæттæ нæм нæй. Ам мæнæ куыддæр, цыдæр капек кусæм. Фæлæ нын уый дæр нæ уадзынц. Æмæ мах та æнæ куыстæй нæ бинонты хъуамæ куыд дарæм. Ам ацы бынаты бирæ адæм кусы».
8 азы размæ амалхъом адæймаг Бигъаты Эльбрус æрæмбырд кодта машинæтæ кæмæ уыд, ахæм адæмы æмæ кусын райдыдтой æхсæнадон транспорты хуызы. Фæлæ фæстаг цалдæр къуырийы уавæр аивта. Паддзахадон автоинспекцийы кусджытæ бацагуырдтой чи дзы кусы, уыцы шофырты номхыгъд, райдыдтой сæ уромын. Уымæй уæлдай ма сæ фæивар кæнынæй æртхъирæн кæнын райдыдтой.
Æлдаттаты Сослан, æхсæнадон таксийыл кусæг: «Мах никæй никæцы `рдыгæй хъыгдарæм. Никæй куыст байстам. Æрæмбырд стæм иумæ, æмæ иу цасдæр рæстæг кусæм. Цæмæй нæ къонатæ истæмæй дарæм, ууыл архайæм».
Шофыртæ сæ хъаст бахастой Беслæны администрацимæ. Беслæны мэр Хуыбаты Маирбег куыд зæгъы, афтæмæй рог хæдтулгæтæн бар нæй æхсæнадон транспорты куыст кæнынæн. Закъонмæ гæсгæ, 8 бадæн бынатæй къаддæр цы машинæйы ис, уый хъуамæ кæна æрмæстдæр таксийы куыст.
Уымæй уæлдай ма ацы чысыл куыстуатмæ нæй лицензи дæр. Фæлæ уыцы хъуыддаджы тыххæй шофыртæм сæхи хъуыды ис.
Бигъаты Эльбрус, амалхъом адæймаг: «Тендер куы уыди, уæд нæм уæвгæ дæр нæ бадзырдтой. Ничи нын фехъусын кодта. Ацы хъуыддаг та уымæн кæнынц æмæ сæхæдæг кусой ацы бынаты. Мах адæмы та нæ уадзынц. Тæрсын кæнынц, ивартæ, дам, 50 мины бафиддзыстут. Афтæ æнхъæлынц, æмæ ам асфальтыл лæвар æхцатæ ис».
Кæронбæттæны хатдзæгтæ сты ахæм: Туманыл чи ласы, ахæм такситæм лицензи нæй. Тендермæ гæсгæ ахæм бар ныр ис æндæр куыстуатмæ. Ацы кусæг къорды уæнгтæ та хъуамæ райсой лицензитæ куыд такситыл кусджытæ, афтæ. Кæнæ та кусынмæ бацæуой бæлццæттæ ласынæн тендер чи рамбылдта, æмæ бар кæмæн ис, уырдæм.
Фæлæ Беслæны тумантыл кусæг такситимæ кæндзысты тох – зæгъынц администрацийы.
Зыхъуаты Жаннæ
