Хæзныдоны амбулатори у кæлæддзаг уавæры, бындурон цалцæг дзы нысангонд у 2026 азмæ
Адæмон фронты активисттæ Æрæфы районы сарæзтой мониторинг фельдшерон-акушерон пункттæн æмæ амбулаторитæн. Уавæр иу хуызон нæу. Кæцыдæр хъæуты æнтыстджынæй кусынц, иннæты та сты æдзæллаг. Хæзныдоны амбулатори у кæлæддзаг уавæры. Бындурон цалцæг дзы нысангонд у 2026 азмæ. Æркаст саразджытæ раиртæстой риссагдæр фæрстытæ. Бæлвырддæр радзурдзæн Чехойты Фатимæ.
Лескены амбулатори æрбынат кодта раздæры совхозы бæстыхайы, скодтой дзы бындурон цалцæг. Дзуапп дæтты нырыккон домæнтæн. Адæмæн медицинон æххуыс кæнынц дохтыртæ, уым кусы боныгон стационар. Фæлæ дзы ис йæхи лыггæнинаг фарстатæ. Лабораторон иртæстытæ скæнынæн рынчынтæн фæхъæуы æндæр медицинон куыстуæттæм цæуын, нæй дзы санитарон агъуыст дæр.
Толдзгуыны ис чысыл, фæлæ алы цæрæгæн дæр хъæугæ фельдшерон-акушерон пункт. Кусынц фельдшер æмæ санитаркæ, Терапевт æрцæуы алы дыццæг, сывæллæтты дохтыр та – алы цыппæрæмы. 500 адæймагæн лæггад кæны медицинон куыстуат, уыдонæй 35 сты сывæллæттæ. Фельдшерон-акушерон пункты ис афтечы пункт дæр.
Хæзныдоны амбулаторийæн йæ уавæр сæ хуыздæртæй нæу. Къултæ аскъуыдтæ сты, пъолтæ – ивинаг. Æрæджы баивтой бæстыхайы сæр. Æрæфы районы рынчындоны сæйраг дохтыры ныхæстæм гæсгæ, бындурон цалцæг скæнын фæнд кæнынц 2027 азы.
Æрæфы районы ацы иунæг фельдшерон-акушерон пункт у рацаразинаг. Фæстаг дыууæ азмæ районы фæзынд 8 фельдшерон-акушерон пункты æмæ амбулаторийы.
Æркасты рæстæг цы хъæндзинæдтæ сбæрæг кодтой, уыдоны хыгъд ратдзысты профилон ведомствотæн. Адæмон фронты активисттæ ныфс æвæрынц: ахæм æркæстытæ арæст цæудзысты фидæны дæр, цæмæй иу лыггæнинаг фарст дæр æнæ цæстæнгасæй ма баззайа.
