Адæмон фронты активисттæ сбæрæг кодтой, Дзæуджыхъæуæй Беслæнмæ æмæ Алагирæй Дзæуджыхъæумæ бæлццæтты чи ласы, уыцы автобусты куысты фæтк. Хъаст бахастой адæм. Куыд зæгъынц, афтæмæй автобустæ кæнæ дзаг вæййынц, кæнæ та линимæ æппындæр нæ рацæуынц. Мониторинджы хатдзæгтæм йæ цæст дардта не сфæлдыстадон къорд дæр. Бæлвырддæр радзурдзæн Касаты Наирæ.
Изæры 5 сахаты, адæм фылдæр куы вæййы, уыцы рæстæг. Тагъд кæнынц Дзæуджыхъæу-Беслæны автобустæ æмæ маршруткæтæм. Адæмон фронты минæвæрттæ ардæм æрбацыдысты бæлццæтты курдиæтты фæстæ. Адæм хъаст кæнынц автобустæ фæткмæ гæсгæ кæй нæ кусынц, уымæй. Уый иу. Иннæ фарста – фæндаггаг бафидыны терминалтæ кæй нæ кусынц, уый.
Адæмон фронты регионалон æмсæрдар сбæрæг кодта, валидатортæ кусынц, æви нæ, уый. Ныртæккæ кусынц. Æхсæнадон кусджытæн исты куысты фæткыл сæ цæст не рхæцыд. Бæлццæттæ бирæ, фæлæ сын бынæттæ фаг нæй.
Адæмон фронтимæ иумæ æхсæнадон транспорты куыстæн мониторинг скодтой бæлццæттæласæн компанийы минæвæрттæ.
Адæмон фронты минæвæртты æмæ журналистты цур автобустæ Алагирмæ цæуынц фæткмæ гæсгæ, æнæкъуылымпыйæ.
Фæлæ уæддæр адæм куыд зæгъынц, афтæмæй транспорт цæуы дзагæй æмæ фæстиатгæнгæйæ. Бæлццæттæн кæнæ æппындæр нæ бантысы автобусмæ бахизын, кæнæ та транспорт зынгæ дæр нæ фæкæны.
Автобустæ ис. Ис сын сæрмагонд куысты фæтк дæр. Адæм зæгъынц, шофыртæ фæтк куы æххæст кæной, уæд дзы къуылымпытæ дæр нæ уыдзæн.
