Бæрæггонд куыд у, афтæмæй ахуыргæнæндонмæ 100 метрæй хæстæгдæр нæй уыцы продукци уæй кæнæн
Адæмон фронты активисттæ сбæрæг кодтой, куыд æххæстгонд цæуы скъолатæм хæстæг дуканиты хъæбæр нозт æмæ тамакойы продукци уæй кæныны закъон куыд æххæстгонд цæуы, уый. Бæрæггонд куыд у, афтæмæй ахуыргæнæндонмæ 100 метрæй хæстæгдæр нæй уыцы продукци уæй кæнæн. Бирæ амалхъом адæм , уыцы хъуыддæгттæ нæ хынцынц, æмæ тамако уæй кæнæн бынæттыл цæст æрхæцы скъолаты цур. Адæмон фронты минæврттимæ рейды уыд не сфæлдыстадон къорд. Бæстондæр хабæрттæ Сосранты Жаннæмæ.
Адæмон фронты активисттæ лæмбынæг кæсынц картæмæ. Зонын хъæуы ахуырадон уагдон хæстæгдæр дуканимæ цас дæрддзæф у, уый. Куы сбæрæг кæной дуканийы тамакотæ уæй кæнынц, уæд йæ хицау канд уайдзæфыл нæ баззайдзæн, фæлæ ма æфхæрд байайфдзæн административон уагæй.
15 -æм скъола бындурон цалцæджы фæстæ нæма байгом. Хæстæгдæр дуканимæ цæуын хъæуы 50 метры. Закъонмæ гæсгæ нозт æмæ тамако скъоламæ 100 метрæй хæстæгдæр уæй кæнæн нæй. Уæйгæнджытæ куыд зæгъынц, афтæмæй, скъоладзаутæ дуканимæ арæх æрбацæуынц. Ам тамако нæ фелхæнынц, канд хæринæгтæ, дон, адджинæгтæ.
Ацы дукани у Дзæуджыхъæуы 6 -æм скъолайы комкоммæ. Йæ ирд ахорæнтæй здахы куыд хистæрты, афтæ рæзгæ фæлтæры ргом дæр. Дуканийы кусджытæ сфæлдыстадон къорды куы федтой, уæд ахуыссын кодтой сæ цырæгътæ. Адæмон фронты активисттæн куыд бамбарын кодтой, афтæмæй сæ уый размæ дæр фæивар кодтой тамакойы продукци уæй кæныны тыххæй.
Уæйгæнæджы ныхæстæм гæсгæ сæм скъоладзаутæ арæх нæ цæуынц. Уыимæ æнахъомтæн сæ товар нæ уæй кæнынц. Скъоламæ хæстæг базарадон бынæттæ иваргонд цæудзысты сабитæн тамакотæ куы уæй кæной , уæд. Административон ивар, æцæгæлон адæмæн 2 000 -мæй 3 000 соммæ; бынаты хицæуттæн та у – 5 000 -æй 10 000 -ин сæммæ; юридическон бæрнондзинадæн уыдонмæ та æнхъæлмæ кæсы ивар 30 000 -æй 50 000 -соммæ.
Адæмон фронты активисттæ дарддæр дæр сæ цæст дардзысты закъон куыд æххæст кæнынц, уымæ. Цы хъæндзинæдтæ раиртасой, уыдон та фæхæццæ кæндзысты прокуратурæ æмæ Дзæуджыхъæуы бынæттон администрацимæ.
