Ацы хатт æхсæнадон архайджытæ бабæрæг кодтой горæты 3 скъолайы
Адæмон фронты эксперттæ бæлвырд кæнынц Дзæуджыхъæуы скъолаты сывæллæтты хъарм хæринагæй æххæст кæныны хъуыддаг. Ацы хатт æхсæнадон архайджытæ бабæрæг кодтой горæты 3 скъолайы – 40-æм, 41-æм æмæ 42-æм. Бæстондæр радзурдзæн Хъайтмазты Дзерассæ.
Фыццаг, дыккаг æмæ компот – алцыдæр куыд æмбæлы, афтæ. Стæй ма фæткъуы. Адæмон фронты мониторингмæ гæсгæ, специалисттæ бабæрæг кодтой Дзæуджыхъæуы 41-æм скъолайы хæрæндон. Дзидзайы хойрæгтæ ахуырдзаутæн æрбаласынц скъолатæн хæринаггæнæн комбинатæй, хъæрхуыппытæ, гарниртæ æмæ сын салаттæ та цæттæ кæнынц ахуыргæнæндоны хæринаггæнджытæ. Хæрæндоны сæйраг эксперттæ æнæмæнг сты сывæллæттæ. Алкæмæндæр менюйы ис уарзон хойраг.
Адæмон фронты минæвæрттæ се ргом здæхтой менюмæ, хойрæгты хæрзхъæддзинадмæ, санитарон нормæтæм, стæй техникон æгъдауæй ифтонгмæ. Мониторингмæ гæсгæ специалисттæ бабæрæг кодтой Дзæуджыхъæуы 40-æм скъола дæр. Ам сывæллæтты хæринагæй æххæст кæнынц цалдæр къæпхæнæй. Фыццаг хæрын кæнынц райдайæн кълæсты ахуырдзаутæн, уый фæстæ льготæтæ кæмæн æмбæлы, уыдонæн – фæкæсынхъуаг бинонтæй сывæллæттæн, стæй кадеттæн æмæ сæрмагонд æфсæддон операцийы архайджыты сывæллæттæн. Æдæппæтæй 800 скъоладзауы онг. Фарон 40-æм скъолайы хæрæндон æппæтуæрæсеон конкурсы бацахста 3-аг бынат. Ерыс уыд Мæскуыйы. Директор Уæзæгты Зойæ куыд зæгъы, афтæмæй ацы сæрд хæрæндоны райдайдзæн бындурон цалцæг.
Адæмон фронты минæвæрттæ аргъ скодтой Дзæуджыхъæуы 42-æм скъолайы хæрæндоны куыстæн дæр. Ам æрвылбон хъарм хæринагæй æххæст кæнынц 600 ахуырдзауæй фылдæры. Эксперттæ куыд загътой, афтæмæй 3 скъолайы дæр алцыдæр æмбæлгæ æмвæзадыл конд цæуы. Ис чысыл фиппаинæгтæ, фæлæ сæ хæстæгдæр рæстæг аиуварс кæндзысты.
Адæмон фронты мониторинг дарддæр цæудзæн æрмæст Дзæуджыхъæуы скъолаты нæ, фæлæ республикæйы районты дæр. Æппæт фиппаинæгтæ æрвыст цæудзысты профилон ведомствæтæм.
