Иууылдæр сты райдзаст, хъарм, сæйрагдæр та – афтектимæ
Адæмон фронты минæвæрттæ мониторинг скодтой фельдшерон акушерон пункттæн. Иууылдæр сты райдзаст, хъарм, сæйрагдæр та – афтектимæ. Специалисттæ сбæрæг кодтой медицинон пунктты лæггæдты хæрзхъæддзинад, стæй кусæнгæрзтæй куыд ифтонг сты, уый. Активисттимæ объекттæ бабæрæг кодта Тъехты Элинæ дæр.
Фельдшерон – акушерон пункт Бехъаны кусы 6 мæйæ фылдæр. Адæмон фронты регионалон хайады минæвæрттæ æрцыдысты, цæмæй медицинон бæстыхай куыд ифтонггонд у, стæй адæмæн цы лæггæдтæ кæнынц, уыдоны хæрзхъæддзинадмæ æркæсой, уый тыххæй.
Уымæй уæлдай адæмон фронты минæвæрттæ бабæрæг кодтой Фыййаджыбылы фельдшерон – акушерон пункт дæр. Æркастысты медицинон кусæнгæрзтæм. Уæлдай цæстдард цыд, хостæ цы пункты уæй кæнынц, уымæ. Скодтой йæ, цæмæй хъæуы цæрджытæн æнцондæр уа, уый тыххæй. Фельдшерон – акушерон пункт лæггад кæны 560 адæймагæн. Уыдонæй 86 сты сывæллæттæ. Фельдшер Надежда Сагитова куыд зæгъы, афтæмæй зоны йæ бæрны цы рынчынтæ ис, уыдонæй алкæцыйы дæр.
Уæдæ æхсæнадон кусджытæ уыдысты Хæтæлдоны дæр. Фельдшерон – акушерон пунктмæ цы фæндаг уыд, уый æрæджы дæр ма уыд пырх. Фæлæ Адæмон фронты минæвæрттæ Алагиры районы администрацимæ курдиат куы балæвæрдтой, уæд фарста лыггонд æрцыд. Ныр медицинон бæстыхайæн ис йæхи фельдшер. Раздæр та – иу цыд районы рынчындонæй. Æркасты хатдзæгтæм гæсгæ, хъæуты медицинон лæггæдты хæрзхъæддзинад кæны хуыздæрæй – хуыздæр.
Адæмон фронты минæвæрттæ ныридæгæн æркастысты республикæйы алы районты 6 фельдшерон – акушерон пункттæм. Фæнд ма кæнынц къуырийы æмгъуыдмæ бабæрæг кæнын иннæ медицинон бæстыхæйттæ дæр.
