Транспортон фæрæзæн скодтой тест-драйв
Ахадгæ æххуыс. Адæмон фронты минæвæрттæ сæрмагонд æфсæддон операцийы зонæмæ бацæттæ кодтой машинæ. Транспортон фæрæзæн скодтой тест-драйв. Æппæт домæнтæн дзуапп дæтты. Сæрмагонд операцийы зонæмæ ма арвитдзысты маскировкæгæнæн хыз – йæ фæзуат 100 квадратон метры. Ацы хъуыддаг æххæстгонд æрцыд проект «»Алцыдæр уæлахизæн»-мæ гæсгæ. Бæлвырддæр радзурдзæн Хъайтмазты Дзерассæ.
Проект «Алцыдæр уæлахизæн» æххæстгæнгæйæ Адæмон фронты минæвæрттæ бацæттæ кодтой, æвзæр фæндæгтыл хорз чи цæуы, ахæм машинæ, цæмæй йæ сæрмагонд æфсæддон операцийы зонæмæ арвитой. Машинæ организацийы регионалон хайадæн радта бастдзинады, информацион технологиты æмæ дзыллон информацийы фæрæзты къабазмæ цæстдарды цæгатирыстойнаг управлени.
Машинæмæ уыд техникон æркаст. Ныртæккæ ис хорз уавæры. Ахæм хатдзæг тест-драйвы фæстæ скодта адæмон фронты æххæстгæнæн цæгатирыстойнаг комитеты разамонæг Гæлиты Клим.
Адæмон фронты регионалон комитеты минæвæрттæ хæстонтæн ныридæгæн арвыстой 14 транспортон фæрæзы – æвзæр фæндæгтыл хорз чи цæуы, ахæм машинæтæ,уæзласæнтæ æмæ ма суанг квадроциклтæ дæр. Гæлиты Клим куыд загъта, афтæмæй ацы хъуыддаг дарддæр æххæст кæндзысты.
Адæмон фронт ахадгæ æмгуыстад кæны алыхуызон æхсæнадон организацитимæ. Змæлд «Согрей солдата»-йы волонтертæ æдзух быйынц нæ хæстонтæн хызтæ. Ацы хатт сын хуымæтæг хæслæвæрд нæ уыд. Хъуыдис 100 квадратон метры фæзуат кæмæн ис, ахæм хыз сцæттæ кæнын. Уый, кæй фæкæнынц, уымæй 4 хатты стырдæр у. Фæлæ волонтертæ ацы хъуыддаг цыбыр рæстæгмæ сæххæст кодтой.
Хыз ныридæггæн радтой, хæстæгрæдæр рæстæг æй сæрмагонд æфсæддон операцийы зонæмæ чи аласдзæн, уыцы хæстонмæ. Йæ фæрцы бантысдзæн танк æрæмбæрзын, æмæ нæ лæппуты бахъахъхъæнын.
