Ныртæккæ дзы цы рæвдауæндон ис, уый ис заууат уавæры
Адæмон фронты регионалон хайады минæвæрттæ Дур-Дуры цæрджытæн æххуыс кæнынц, ног рæвдауæндон саразыны хъуыддаджы. Ныртæккæ дзы цы рæвдауæндон ис, уый ис заууат уавæры. Дур-Дуры ныртæккæ ис, рæвдауæндонмæ цæуын кæмæн æмбæлы ахæм 200 сывæллоны. Уый нымайгæйæ адæмон фронты активисттæ архайдзысты, цæмæй Дур-Дуры федералон программæты фæрцы саразой ног рæвдауæндон. Бæлвырддæр радзурдзæн Сосранты Жаннæ.
«Адæмон фронты» минæвæрттæ федтой Дур-Дуры сывæллæтты рæвдауæндоны уавæртæ. Бæстыхай раздæр уыд колхозы сæрдары хæдзар. Кæд рæвдауæндоны домæнтæн æххæстæй дзуапп нæ лæвæрдта, уæддæр дзы скодтой сывæллæтты рæвдауæндон. Фæстæдæр ма йæм бафтыдтой дыууæ уаты. Хъыгагæн æдасдзинады домæнтæ дзы æххæстгонд не рцыдысты. Ныр, уымæ гæсгæ дæр æвзарынц зындзинæдтæ. Къултæ, куыд мидæгæй, афтæ æддейы дæр аскъуыдысты. Уæдæ арæзтадыл рæстæджы цыд йæ фæд уадзы. Фарстайаг сты электрон хызты æмæ дондзæуæн системæйы уавæр. Уæвгæ диссаг дæр нæу 60 азы цы бæстыхайыл цæуы, уый гæнæнтæ абоны домæнтæн дзуапп кæй нал дæттынц, уый.
Цæлгæнæны нæй фæздæгдзæуæн, хæринаггæнгæйæ сæ фæхъæуы дуар гомæй уадзын.
Рæвдауæндоны сæргълæуæджы ныхæстæм гæсгæ районы хицауад зонгæ у сæ фарстаимæ. Фæлæ ног бæстыхай саразынæн цас фæрæзтæ хъæуы, уый хынцгæйæ зæгъæн ис районы бюджеты ахæм æхца кæй нæй. Уыимæ хъуыддаг раиртасинаг у. Ацы уавæрты сывæллæтты дарæн нал ис.
Зæгъын ма хъæуы уый дæр, æмæ рæвдауæндонæн рæстæгмæ дæр нæй сæхгæнæн. Цæуы йæм 84 сабийы. «Адæмон фронты» минæвæртты ныхæстæм гæсгæ ныртæккæ сæйрагдæр хæс у – бæстыхай кæлæддзагыл нымад куыд æрцæуа, уый. Уæд æй уыдзæн бахæссæн федералон программæмæ. Адæмон фронты активисттæ зæрдæ бавæрдтой куыстуатмæ цæстдардæй.
Кировыхъæуы скъолайыл æнусы рдæгæй фылдæр цæуы. Ахуырадон уагдоны директор куыд зæгъы, афтæмæй куыд дарддæр, афтæ зындæр кæсæн у йæ цалцæгмæ. Йæ ныхæстæм гæсгæ, æрвылаз дæр бацалцæг кæнынц. Фæлæ рагæй дæр у бындурон цалцæггæнинаг. Специалисттæ федтой бæстыхайы уавæр. Цалцæггæнæн куыстытæ райдайын нысан кæнынц майы. Ног ахуыры аз хъуамæ райдайой аив бæстыхайы.
Программæ ахуырады системæ фæахадгæдæр кæнынмæ гæсгæ республикæйы куыст æрцæудзæн 44 скъолайыл. Алцыдæр конд æрцæудзæн Федералон фæрæзты фæрцы. Сæрмагонд амынддзинæдтæ сæрды радта регионы сæргълæууæг.
Уымæй уæлдай ма ахуыргæнæндæтты фæнд кæнынц баивын кълæсты дзаумæттæ. Иуæй иу скъолаты та, куыстытæ конд æрцæудзысты иннæ аз сæрды, цæмæй ахуырадон процесс ма бахъыгдарой, уый тыххæй.
