Ныртæккæ дзы цы рæвдауæндон ис, уый ис заууат уавæры æмæ тæссагдзинад хæссы сывæллæты цард æмæ æнæниздзинадæн
Адæмон фронты регионалон хайады минæвæрттæ Дур-Дуры цæрджытæн æххуыс кæнынц, цæмæй хъæуы ног рæвдауæндон саразой. Ныртæккæ дзы цы рæвдауæндон ис, уый ис заууат уавæры æмæ тæссагдзинад хæссы сывæллæты цард æмæ æнæниздзинадæн. Дур-Дуры ныртæккæ ис, рæвдауæндонмæ цæуын кæмæн æмбæлы ахæм 200 сывæллоны. Фæлæ уыдонæн сæ фылдæр сты сæ хæдзæртты, уымæн æмæ ныййарджытæ тæрсынц сæ цотæн. Æхсæнадон кусджытæ æркасты рæстæг сбæрæг кодтой, бæстыхайы къултæ кæй ныскъуыдтытæ сты, уый. Пъолтæ нал бæззынц, электрон телтæ та сты ссудзыны ввонг. Канализацийы хæтæл дзыхъмæ конд нæу æмæ уый аххосæй чъизи дæттæ кæлынц бæстыхайы бынмæ. Ахæм уавæрты та сывæллæты дарæн нæй. Уый нымайгæйæ адæмон фронты активисттæ архайдзысты, цæмæй Дур-Дуры федералон программæты фæрцы саразой ног рæвдауæндон.