Кæм уыдысты, уыцы бынæттæй иутæ æвзæрст æрцыдысты адæмы курдиæттæм, стæй сæхи æнкъарæнтæм гæсгæ, иннæтæ та ист æрцыдысты «Пырх фæндæгты картæ»-йæ
Адæмон фронты регионалон хайады минæвæрттæ ногæй сбæрæг кодтой горæты фæндæгты уавæр. Кæм уыдысты, уыцы бынæттæй иутæ æвзæрст æрцыдысты адæмы курдиæттæм, стæй сæхи æнкъарæнтæм гæсгæ, иннæтæ та ист æрцыдысты «Пырх фæндæгты картæ»-йæ. Адæмон фронтимæ абалц кодта не сфæлдыстадон къорд. Бæстондæр радзурдзæн Чехойты Фатимæ.
Ахæм дзыхъхъытæ Пушкинскийы уынджы – иу иннæйы фæдыл. Фæндаг сцалцæг кæнынц, фæлæ уæддæр хæлд уаццæгтæ къаддæр нæ кæнынц. Ам чысыл нæй, уæзласæн машинæтæ арæх кæдæм базилынц, ахæм коммерцион куыстуæттæ. Уый Адæмон фронты минæвæрттæ нымайынц фæндаджы æвзæр уавæры аххосæгтæй иуыл. Шофырты хъуыдымæ гæсгæ та, æркæсын хъæуы цалцæггæнæн куыстыты хæрзхъæддзинадмæ.
Адæмон фронты эксперттæ сбæрæг кодтой Тельманы уынджы фæндаджы уавæр Хæххон металлургон институтмæ хæстæг. Дардæй ацы дзыхъхъ фенæн нæй. Рагацау æй кæй цæст ацахсы, уыдон йæ алывæрсты азилынц, иннæтæ та фæндаггон змæлд фехалынц. Фæзынд коммуналон слæжбæйы куыстыты фæстæ.
Чапаевы уынджы хид дæр æнæ æхсæнадон кусджыты цæстдардæй нæ баззад. Æркæсинаг у йæ иу уаццаг. Охотничий фæрсуынг дæр Адæмон фронты минæвæрттæ фыццаг хатт нæ бабæрæг кодтой. Кæд йæ дæргъ чысыл у, уæддæр дзы цæрджытæ – бирæ. Ис дзы социалон объекттæ дæр. Адæм фæндаджы цалцæгыл сæ зæрдæтæ нал дарынц, æмæ дзыхъхъытæ сæхæдæг раст кæнынц агуыридуртæй.
Адæмон фронты активисттæ республикæйы фæндæгты уавæр арæх фæбæрæг кæнынц. Хыгъд æрцæуынц цæрджыты курдиæттæ, стæй «Пырх фæндæгты картæ»-мæ хаст уынгтæ. Æркæсынц æрмæст фæндæгты æмæ фистæгæйцæуджыты къахвæндæгты уавæртæм нæ, фæлæ бирæуæладзыгон хæдзæртты кæртытæм дæр. Уыцы куыст хорз фадат у риссаг фарстатæ раргом кæнынæн. Йæ руаджы агуырд æрцæуынц хъæндзинæдтæ иуварс кæныны мадзæлттæ.
