Ацы хатт бабæрæг кодтой Дзæуджыхъæуы реабилитацион-дзæбæхгæнæн центр «Хæххон уæлдæф» æмæ Цмийы лагерь «Звездочка»
Адæмон фронты специалисттæ бæлвырд кæнынц сывæллæтты лагерьты хæрæндонты уавæртæ. Ацы хатт бабæрæг кодтой Дзæуджыхъæуы реабилитацион-дзæбæхгæнæн центр «Хæххон уæлдæф» æмæ Цмийы лагерь «Звездочка». Цы федтой, уымæй баззадысты разыйæ. Ахæм мониторингтæ арæзт цæудзысты республикæйы иннæ лагерьты дæр. Бæлвырддæр радзурдзæн Хъайтмазты Дзерассæ.
Прындзы кас, цыхт æмæ къалбасимæ бутерброд, цай. Ам аходæнмæ ничи рæджы кæны. Адæмон фронты мониторинг æххæстгæнгæйæ специалисттæ бабæрæг кодтой сывæллæтты реабилитацион-дзæбæхгæнæн центр «Хæххон уæлдæф». Ныртæккæ дзы цæуы барадхъахъхъæнæн-патриотон профилон рад «Патриот». Æдæппæтæй дзы ис 11-æй 17 азы онг кæуыл цæуы, ахæм 50 лæппу æмæ чызджы. Се хсæн 13-аздзыд Алим Мамедов дæр.
Адæмон фронты специалисттæ цæст дардтой менюмæ, хойрæгты хæрзхъæддзинадмæ, санитарон домæнтæм, стæй хъæугæ кусæнгæрзтæй ифтонгмæ. Федтой, продукттæ кæм дарынц, уыцы скълад дæр. Æрæджы ам бындуронæй сцалцæг кодтой хæрæндон федералон проект æххæстгæнгæйæ. Иннæ аз сывæллæтты реабилитацион-дзæбæхгæнæн центры сараздзысты уæлæмхасæн коттеджтæ.
Адæмон фронты минæвæрттæ ма бабæрæг кодтой сывæллæтты лагерь «Звездочка» дæр Цмийы. Ам цæуы 5-æм рад. Сæ фæллад дзы уадзы 35 сывæллоны. Ам сын хæрын кæнынц бон 5 хатты. Специалисттæ æркастысты хæрæндоны уавæртæм, базонгæ сты менюимæ. Адæмон фронты регионалон штабы уæнг Бериты Олег куыд загъта, афтæмæй сывæллæтты лагеры хæлцад дзуапп дæтты хъæугæ стандарттæн.
Адæмон фронты мониторингтæ уыдзысты республикæйы иннæ лагерьты дæр. Æппæт фиппаинæгтæ æмæ фæндонтæ специалисттæ фæхæццæ кæндзысты профилон структурæтæм.
