Бакуыста йыл хореографты стыр къорд
«Нартæ. Рагон аивады ног рæстæг». Адæмон сфæлдыстады республикон хæдзары равдыстой, «Нарты кадджытæ»-м гæсгæ æвæрд хореографион спектакль. Бакуыста йыл хореографты стыр къорд. Артистты костюмтæ бацæттæ кæныныл бацархайдта Годжыцаты Изольдæ. Спектакль рауад ирд æмæ цымыдисаг. Бæлвырддæр радзурдзæн Хъайтмазты Дзерассæ.
Тугъанты Махарбеджы зындгонд ныв – «Нарты куывд» райгас адæмон сфæлдыстады республикон хæдзары сценæйы. Ам баиу сты Нарты кадджыты æппæт хъайтартæ. Сæйрагдæртæй иу – Сатана ирон бæгæныйы къусимæ. Таурæгътæм гæсгæ, уый уыд сылгоймаджы куырыхондзинады æмæ рæсугъддзинады дæнцæг, иннæтимæ абарæн кæмæн кæй, ахæм. Цориты Мæдинæ Сатанайы фæлгонц фыццаг хатт нæ сарæзта. 2018-æм азы ма ирон бæгæныйы æппæтадæмон фестивалы ацы сурæт йæхиуыл абарста. Мæдинæ куыд загъта, афтæмæй хореографион спектаклы архайд ын у цымыдисаг æмæ бæрнон хъуыддаг.
Сценикон фæлгонцтæ саразыныл 10 мæйæ фылдæр куыста Годжыцаты Изольдæ. Эскизтæ цæттæ кæнынмæ бавналыны размæ, æрмдæсны бæлвырд равзæрста Нарты кадджыты алы лыстæг хъуыддæгтæ. Цыллæ, хъæдабæ, габардин. Цы хъуымæцтæ æмæ фурнитурæ равзæрста, уыдоны руаджы æрбахæстæг кодта эпосы хъайтарты фæлгонцтæ. Костюмтæ рауадысты, Изольдæйæн Нарты кадджытæ кæсгæйæ, йæ цæстытыл куыд ауадысты, ахæмтæ.
Сфæлдыстадон номертæ цæттæ кодтой мæй æмæ *рдæг. Бонæй-бонмæ артисттæ сæ арæхстдзинад хуыздæр кодтой. Равдыстыл куыста 70 хореографы. Спектаклы алы эпизод дæр саив кодтой Нарты кадджытæй скъуыддзæгтæ ирон æвзагыл.
Спектакль саразджытæ нæ ферох кодтой адæмон инструментты тыххæй дæр. Нарты кадджыты ис хицæн сæргæндтæ ацы темæимæ баст. Сæрмагонд æргом аздæхтой Сырдоны 12-тæнон фæндыр саразынмæ. Хореграфион уацмыс саив кодтой Хуссар Ирыстоны сгуыхт композитор Плиты Мураты уацмыстæ Уый бакуыста зындгонд адæмон композицитыл. Режиссер Хъоцлаты Сосланы ныхæстæм, алцыдæр хорз рауад, сфæлдыстадон къорды æнгом æмархайды фæрцы.
Æртæ премьерон боны æмæ æртæ аншлагы. Ирд æмæ цымыдисаг архайд æнæзынгæ æндахæй сбаста ивгъуыд æмæ нырыккон цард. Æмæ радта, Нарты кадджыты æмæ æппæт культурон хæзнаты ахадындзинад фидæны дæр кæй нæ фесæфдзæн, уый ныфс.
Спектакль «Нартæ. Рагон аивады ног рæстæг» бацæттæ кодтой Уæрæсейы культурæйы министрады æххуысæй. Фæнд æй кæнынц Мæскуыйы стыр сценæйы равдисын.
