Ныффыстой сæ Тахъазты Валерий æмæ Будайты Милуся
Ног æвæрæн Ирыстоны чингуыты къæбицмæ. Адæмы размæ хаст æрцыдысты ног рауагъд чингуытæ. Ныффыстой сæ Тахъазты Валерий æмæ Будайты Милуся. Сæ презентацимæ хуынд æрцыд нæ сфæлдыстадон къорд дæр, лæмбынæгдæр хабæрттæ Сосранты Жаннæйы сюжеты.
Диссаджы лæвар сæмбæлдзæн дыгурон дзырд уарзджытыл. Будайты Милусяйы «Бабай аргъæутти» чиныг йæ бакастæй куыд ирд у, йæ мидисæй дæр ахæм арф у. Алы рæнхъæвæрд дæр дзы ис бынаты, сывæллоны раст фæндагыл сæвæрыны хъуыдыимæ.
Милуся тынг разы у Уæрæсейы адæмты хæлардзинады университеты профессор Тахъазты Валерийæ. Куыд зæгъы, афтæмæй йæ фæрцы уагъд æрцыд чиныг.
Уæвгæ Тахъазы фырты æвæрæн дзæвгар у, мадæлон æвзагыл фыссæг авторты чингуытæ цардмæ рахæссыны хъуыддаджы, фæлæ ма ацы хатт та адæмы зæрдæтæ балхæдта йæхи фыст чингуытæй. Бафæндыди йæ, нудæсæм æнусы кæронæй ссæдзæм æнусмæ Ирыстоны журналистикæ æма литературон процесс раиртасын æмæ йæ чиныджы хуызы фидæны фæлтæртæм фæхæццæ кæнын.
Чингуыты презентаци арæзт æрцыд национ наукон библиотекæйы. Мадзалы бацархайдтой культурæйы кусджытæ, республикæйы сфæлдыстадон интеллегенцийы минæвæрттæ, ахуыргæнджытæ, стæй фембæлды мидис сæ зæрдæмæ хæстæг кæмæн уыд, уыцы адæм.
Чингуыты автортæ раргом кодтой сæ ныффыст æрмæджыты мидис. Фæбæрæг кæнын ма хъæуы уый дæр, æмæ мадзалы алы архайæг дæр чингуытæ райста æхсызгон лæварæн.
