Цалцæггæнинаг уынгты кæронбæттæн хыгъд сфидар кæндзысты февралы
Цæлхдурты, стæй ма уæд доны сæрты хизгæйæ. Дзæуджыхъæуы Ставропольскийы уынгыл машинæтæн ацæуын тынг зын у. Дзыхъхъытæ уый иу, фæлæ ма æппынæдзух донæй дзаг. Шофыртæ йыл дæрдтыл цæуынц, фæлæ хатгай уый вæййы иунæг ацæуæн. Цалдæр азы горæты цæрджытæ сæ хъаст хастой Дзæуджыхъæуы администрацимæ. Уыимæ дзыхъхъытæ дæр кодтой фылдæрæй-фылдæр. 2022-æм азы асфальт сæвæрдтой Æбæрæг салдаты уынджы. Уæд цы æрмæг баззад, уымæй фæллойгæнджытæ дзыхъхъытæ сæхгæдтой Ставропольскийы уынджы. Уæддæр, раздæрау, фæндаг у бындуронæй цалцæггæнинаг. Дзæуджыхъæуы администрацийы фæндæгты арæзтады хайады хицау Габеты Чермен куыд радзырдта, афтæмæй рахастой уынаффæ фæндаг сцалцæг кæныны тыххæй. Специалисттæ ивгъуыд аз бынаты аргъ скодтой объектæн. Ныртæккæ уал куыстытæ райдайынæн хъыгдары боныхъæд. Хайады специалисттæ уал скодтой æмбæлгæ гæххæтт, æмæ цалцæггæнæн куыстытæ райдайынмæ хъавынц фæндаггон сезоны райдиан, ома мартъийы кæрон. Фæндаггон кусджыты хъуыдымæ гæсгæ, Ставропольскийы уынджы бындурон цалцæг бацахсдзæн 2-3 мæйы. Ныртæккæ администрацийы специалисттæ кусынц, 2023-æм азы базилинаг уынгты хыгъд. Афтæмæй пъланмæ бахастой Магкæты Зурабы уынг, Къостайы проспект, стæй Коцойты Арсены уынг. Æркæсинаг уавæры ис Уæрæсейы Хъæбатыр Андрей Днепровскийы уынг дæр. Æвзæр фæндаг зынддзинæдтæ æвзæрын кæны куыд фистæгæйцæуджытæн, афтæ шофыртæн дæр. Фæндаджы иу хайыл асфальт сæвæрдтой, иннæ хай та раздæрау у базилинаг. Цалцæггæнинаг уынгты кæронбæттæн хыгъд сфидар кæндзысты февралы.
