Алы арæзтадон фæзмæ дæр бæстон цæстдард цæуы бындурон арæзтады управленийы специалистты рдыгæй
Æдæппæтæй ацы аз, национ проект «Ахуырад» æххæст кæнгæйæ, нæ республикæйы арæзт цæуынц сывæллæтты 8 рæвдауæндоны. Алы арæзтадон фæзмæ дæр бæстон цæстдард цæуы бындурон арæзтады управленийы специалистты рдыгæй. Цæстдарæн службæйæ дарддæр ма районты арæзтадон объекттæн мониторинг кæнынц кусæг къордтæ. Цавæр хатдзæгтæ скæнæн ис ацы куыстæн, уый тыххæй радзурдзæн Гуытъиаты Алинæ.
Дыууæ мæймæ Черменыхъæуы рæвдауæндонæн сцæттæ ис йæ фыццаг уæладзыг. Афæдзы кæронмæ та дзы фæзындзæнис, сæдæ дыууын сывæллонæн бынат кæм уыдзæнис, ахæм ахуыргæнæндон. Ныртæккæ арæзтадон бригад райдыдта аразын дыккаг уæладзыг, коммуникацитæ та фесты кæронмæ æвæрд.
Бæстыхайы уыдзæнис хицæн модулон хъармгæнæн дæр. Энергон ресурстæм ног рæвдауæндон баиу кæндзысты æнæкъуылымпайæ, зæгъынц арæзтадон компанийы минæвæрттæ. Уыцы иу рæстæг объекты цæуынц уынджы аивгæнæн куыстытæ. Ныридæгæн уал бацæттæ кодтой авд хъазæн фæзы кæм æрбынат кæндзысты, ахæм фæзтæ.
Бæстыхай у æнæхъæн блок. Куыстыты архайынц æртын адæймаджы. Уал специалисты кусынц Ногхъæуы дæр. Арæзтады архайы уыцы иу подрядон организаци. Ныридæгæн уал фесты арæзт фыццаг уæладзыг, бавнæлдтой дыккаг амайынмæ дæр. Уымæй уæлдай мидæгæй æвæрынц канализацийы хызтæ. Тагъд рæстæг та райдайдзысты сывæллæттæн хъазæн фæзтæ аразынмæ. Æдæппæтæй горæтгæрон районы аразынц цыппар рæвдауæндоны. Куыстыты цыд у хорз, зæгъынц профилон ведомствæйы.
Дзæуджыхъæуы аразынц дыууæсæдæ æстай бынатæн рæвдауæндон. Арæзтад райдыдта ацы аз сæрды æмæ куыстыты цыдмæ ивддзинæдтæ бахаста боныхъæд дæр. Къæвдаты рæстæг иу арæзтад æруырæдтой. Подрядон компани фæахадгæдæр кодта куыстыты цыд. Ныртæккæ объекты кусы цыппор фондз адæймаджы.
Ахæм сывæллæтты рæвдауæндон аразынц Хъесаты Астаны уынджы дæр. Дыууæ проектмæ дæр ис арæзтад æмæ архитектурæйы министрады цæстдард. Ведомствæйы разамонæг Моргуаты Константин куыд зæгъы, афтæмæй зæрдæхсаинаг у Хъызлары цы сывæллæтты рæвдауæндон аразынц уый дæр. Гæнæн ис æмæ объекттæ афойнадыл нæ фæуыдзысты. Æмгъуыдтæ баййафæн ис, арæзтæдты кусджыты нымæц куы фæфылдæр кæной, уæд. Графиккæй фæсте кæй баззадысты, уымæн, специалистты хъуыдымæ гæсгæ ис цалдæр аххосаджы.
Сæдæ дыууын бынатæн сывæллæтты рæвдауæндон аразынц Хъарман-Сындзыхъæуы дæр. Алы рæвдауæндон дæр аразынц хицæн проектмæ гæсгæ. Иннæ азтимæ абаргæйæ арæзтадæн радих кодтой къарддæр æхцатæ.
Ацы аз национ проект «Ахуырады» фæрцы нæ республикæйы аразынц сывæллæтты аст рæвдауæндоны. Се ппæт дæр хъуамæ сцæттæ уой ацы азы кæронмæ. Ныртæккæ бацархайын хъæуы, цæмæй проекттæ æххæст кæнынмæ саразой хорз уавæртæ. Уый фæрцы та хуыздæр кæндзæн фæллойадон кадрты уавæр дæр.
