Лагерь архайын райдыдта 5 азы фæстæ фæсивæды хъуыддæгты фæдыл федералон агентады гранты фæрцы
Æфсæддон-спортивон лагерь «Балц» та суазæг кодта рæзгæ фæлтæры. Лагерь архайын райдыдта 5 азы фæстæ фæсивæды хъуыддæгты фæдыл федералон агентады гранты фæрцы. Ахуырадон программæйы ис ногдзинæдтæ. Ацы аз рæзгæ фæлтæрæн сарæзтой æнæпилотон тæхæн аппараттимæ архайыны курсытæ. Рад ахæсдзæн 18 боны. Бæлвырддæр радзурдзæн Хъайтмазты Дзерассæ.
Кæддæр ацы æфсæддон-спортивон лагерь уыд, мингай лæппутæ æфсады службæйы ахсджиагдæр зонындзинæдтæ кæм истой, ахæм бынат. «Балц» уыд лæгдзинады скъола. 25 азмæ йæ рауагъдонтæй бирæтæ систы афицертæ. 2020-æм азы зындгонд лагеры куыст æрлæууыд æмæ та ныр 5 азы фæстæ программæ ногæй архайын райдыдта фæсивæды хъуыддæгты фæдыл федералон агентады гранты фæрцы. Йæ бæрц у 2 милуан сомы. «Балц» суазæг кодта ног фæлтæр – 80 лæппуйы онг 14-æй 17 азы онг кæуыл цæуы, ахæмты. Уыдонæй иу у Телæхъуырты Дамир.
Рæзгæ фæлтæрæн амонынц раздæры дисциплинæтæ – хæстрæнхъон цæттæдзинад, æхсын æмæ маскировкæйы техникæ, тактикон медицинæ æмæ топографи. Лагеры ахуырадон программæ рæстæгимæ æмдзу кæны. Уымæ гæсгæ ис ногдзинæдтæ дæр. Зæгъæм, æнæпилотон тæхæн аппараттимæ архайыны курсытæ.
Лагерь аразджытæ куыд зæгъынц, афтæмæй сæйраг нысан у, æнæниз царды уагы пропагандæ æмæ рæзгæ фæлтæры *хсæн закъонхæлдтыты профилактикæ. 18 боны дæргъы лæппутæ архайдзысты æрмæст физикон цæттæдзинадыл нæ, фæлæ уды фидардзинадыл дæр. Семæ кусынц æцæг професиионалтæ – фæлтæрдджын инструктортæ, службæйы ветерантæ æмæ сæрмагонд операцийы архайджытæ. Фæндты ис, цæмæй лагерь афæдзы дæргъы куса æмæ йæ рахæссын æндæр, хуыздæр ифтонггонд фæзмæ.
«Балц» у, гæнæн ис, æмæ афицерты рæнхъытæ фидæны чи баххæст кæндзæн, уыцы лæппуты стыр фæндаджы хай. Лагеры куыст кæй сног ис, уымæн стыр нысаниуæг ис. Уымæн æмæ йæ сæйраг нысан у, фæсивæды хъомылад.
