Уымæй дарддæр ма дыккаг бынат бацахста Италийы
Музыкæ зæрдæйæ уарзын… Чайковскийы номыл 1-æм музыкалон скъолайы 6-æм къласы ахуырдзау Æгъуызарты Сæрмæт сси 18-æм æппæтадæмон конкурс «Достояние России»-йы гран-прийы хицау. Уымæй дарддæр ма дыккаг бынат бацахста Италийы. Уым йæ категорийы уыди æппæтæй кæстæр архайæг. Сæрмæтæн ныридæгæн бирæ бантыст. Йæ курдиаты тыххæй бæстондæр радзурдзæн Чехойты Фатимæ.
Лæмбынæг цæстдард нотæтæм, æнгуылдзты змæлдмæ æмæ уыцы-иу рæстæг ахуыргæнæджы ныхæстæм хъусын. Æрмæстдæр афтæмæй ис фортепианойимæ баиу уæвæн, æмæ иу зæлынад ссарын. Ацы ныхæстæ Æгъуызарты Сæрмæтæн хуымæтæг не сты, фæлæ сты æнтыстдзинæдтæм цæуынæн сæйраг нысан. Музыкæ йæ зæрдæмæ фæндаг ссардта, 6 азы куы цыд, уæд. Цымыдисдзинад æм æвзæрын кодта фыццаг уроктæй фæстæмæ.
Музыкæмæ цымыдисдзинадæй равзæрд аивадмæ уарзондзинад. Сæрмæт æмæ музыкæйæн нал ис фæхицæнгæнæн. Афтæ кæй уыдзæн, уый йæ ахуыргæнæгæн рагæй уыд зындгонд. Лæппуйы æгæрон цымыдисдзинад йæ равзæрст дæсныйадмæ уайтагъд бамбæрстой музыкалон скъолайы.
Уацмысты иттæг хорз цагъд æмæ конкурсты уæлахиздзинад сты лæппуйæн йæ куыстуарзондзинад æвдисæг. Йæхæдæг куыд зæгъы, уымæ гæсгæ йын сæйрагдæр у быхсын æмæ йемæ кусгæйæ æдзух ног методтæ чи фæагуры, уыцы ахуыргæнæджы ныстуантæ зæрдыл дарын.
Сценæмæ рацæуыны размæ фæархайы йæ уды сабырдзинадыл, æмæ инструменты раз куы *рбады, уæд æй иннæ хабæрттæ ферох вæййынц. Æрмæстдæр нотæтæ æмæ музыкæ свæййынц йæ царды сæйраг фæзынд.
Афтæ курдиат æмæ куыстуарзондзинад гом кæнынц фæндаг аивады бæрзæндтæм. Уыдоны руаджы Сæрмат Италийы æппæтадæмон конкурсы рамбылдта дыккаг бынат. Кæимæ ерыс кодта уыдонæй Сæрмæт уыд æппæты кæстæр. Кæд курдиатджын цæгатирыстойнаг лæппу тыхсти дард бæстæйы æндæр адæмы хатты *хсæн сценæмæ рацæуын, уæддæр ын бантыст ирдæй равдисын йæ арæхстдзинад æмæ музыкæмæ уарзондзинад.
Италийаг конкурсы размæ арæзт æрцыд Стъараполы «Достояние России». Уым Сæрмæт рамбылдта гран-при. Ацы æнтыстдзинæдтæ сты æрыгон музыканты стыр фидæнмæ уæрæх фæндаг.
