Архайджыты хъуыд сисын видео-ролик æмæ æмдзæвгæ бакæсын
Ирон æвзаг æмæ литературæйы боны кадæн мадзæлттæ арæзт фæцæуынц æнæхъæн мæй. Афтæ æхсæнадон организаци «Ирон фæсивæд» расидти конкурс «Ирон æвзаг». Архайджыты хъуыд сисын видео-ролик æмæ æмдзæвгæ бакæсын. Сергей Меняйлойы номæй конкурсы уæлахиздзауты кады гæххæттытæй схорзæхджын кодта нæ республикæйы ахуырады æмæ наукæйы министр Алыбекты Эллæ. Бæлвырддæр хабæрттæ радзурдзæн нæ уацхæссæг Тъехты Элинæ.
Нæ ресупбликæйы мадæлон æвзаджы райрæзтæн аразынц бирæ мадзæлттæ. Сæ иу – конкурс «Ирон æвзаг». ЦИПУ-йы ирон филологийы факультеты студенткæ æмæ поэт Бестауты Аланæйæн ирон æвзагимæ баст мадзæлтты уæлдай æхсызгондæр вæййы архайын. Ацы хатт сси Гран – прийы аккаг.
Конкурс саразыны хъæппæрис разынд æхсæнадон организаци «Ирон фæсивæд»-мæ. Йæ архайджытæ уыдысты 100 адæймаджы. Хъуыдис сæ видео – ролик сисын æмæ æмдзæвгæ бакæсын. Ахсджиаг у, конкурсы Хуссар Ирыстоны цæрджытæ дæр кæй архайдтой, уый.
Архайджытæн аргъ кодтой 2 категоримæ гæсгæ. Ерыс кодтой, 12 азæй 15 азы онг кæуыл цæуы, стæй 16 азæй фылдæр кæуыл цæуы, уыцы адæм. Конкурс аразынц 4-æм аз. Æмæ азæй – азмæ архайджыты хыгъд кæны æрмæстдæр фылдæр.
Конкурсæн уыд сæрмагонд темæ – «Ирон æвзаг, Ирыстон – мæ хæзнатæ». Уæлахиздзауты нæ республикæйы ахуырады æмæ наукæйы министр Алыбекты Эллæ схорзæхджын кодта Сергей Меняйлойы номæй кады гæххæттытæй.
