Хъæлæс кæныны хæдбар мониторингы архайдтой 5 политикон партийы æмæ 26 æхсæнадон организацийы минæвæрттæ
Цæгат Ирыстоны æхсæнадон палатæ бацæттæ кодта 2500 цæстдарæджы, Конституцимæ ивддзинæдтæ бахæссыныл хъæлæс кæныны бонмæ. Хъæлæс кæныны хæдбар мониторингы архайдтой 5 политикон партийы æмæ 26 æхсæнадон организацийы минæвæрттæ. Ивгъуыд фæлладуадзæн бонты Конституцимæ ивддзинæдтæ бахæссыныл схъæлæс кодтой Цæгат Ирыстоны дæрддзæф хъæуты. 16 æвзарæн хайады байгом сты Горæтгæрон, Алагиры æмæ Æрæфы районты. Алы ран дæр æххæстгонд æрцыдысты Уæрæсейы фæлхасадмæ цæстдарды амынддзинæдтæ. Æвзарæн къамисы уæнгтæн æххуыс кодтой бархион медиктæ.
Дунтæйы цæрæг Хъыбызты Трофим цыбыр рæстæгмæ фæуагъта йæ хæдзары куыстытæ, æмæ суазæг кодта къамисы уæнгты. Æппæтæй дæрддзæфдæр хохаг хъæутæй иуы чи райгуырди, уымæн тынг ахсджиаг у йæ уарзон цæрæн бынаты фидæн. Хъæлæс кæныны бацархайын йæ бон баци, йæ хæдзары уæвгæйæ.
Æвзарджытимæ æмгуыстад цæуы, социалон дистанци хынцгæйæ, æппæт æдасдзинады мадзæлттæ сæххæст кæнгæйæ.
Уыимæ æвзарæн участокты дæр афтæ. Ахæм домæнтæ расидт Уæрæсейы фæлхасадмæ цæстдарды цæгатирыстойнаг Управлени.
Рагагъоммæ æвзæрстытæ арæзт æрцыдысты Горæтгæрон, Алагиры æмæ Æрæфы районты. Сæ дуæрттæ байгом кодтой 16 æвзарæн участочы. Иуæй-иутæ куыстой гом арвы бын. Уыналы æвзæрстытæ ацыдысты бæрæгбоны хуызы. Уазджытыл æмбæлыдысты ирон чъиритимæ æмæ музыкæимæ. Æмбисбонмæ схъæлæс кодтой æвзарджыты 50%.
Адæм зæрдиагæй кæй æрбацыдысты æвзарæн участоктæм, уый дзурæг у, цæрджытимæ æмбæлгæ информацион куыст кæй цыди, ууыл. Афтæ загъта Цæгат Ирыстоны Центрон æвзарæн къамисы сæрдар Моргуаты Жаннæ.
Рагагъоммæ бæрæггæнæтæм гæсгæ, Алагиры æмæ Горæтгæрон районты схæълæс кодтой æвзарджытæн се 80 проценты. Æрæфы районы та – 70 процентæй фылдæр. Протоколтæ арвыстой территориалон æвзарæн къамистæм. 1-æм июлы – хъæлæс кæныны сæйраг боны сæ бахæсдзысты паддзахадон автоматизацигонд системæмæ.
