Æмбырды архайдтой æхсæнадон советы, профцæдисты организацийы, фæндæгты хæдзарады комитеты уæнгтæ æмæ æхсæнадон кусджытæ
Æхсæнадон транспорты ныртæккæйы уавæрыл æмæ йæ фидæны рæзтыл ныхас цыд Адæмон фронты фæзы. Æмбырды архайдтой æхсæнадон советы, профцæдисты организацийы, фæндæгты хæдзарады комитеты уæнгтæ æмæ æхсæнадон кусджытæ. Бæстон ныхас цыд маршрутон такситы тарифтыл. Горæты цæрджытæ хъаст кæнынц, фæндаггаджы аргъ кæй фæфылдæр, уымæй. Фæндæгты хæдзарады комитеты минæвæрттæ куыд загътой, афтæмæй уый аразгæ у транспортон компанитæй. Тарифтæ уыдон снысан кæнынц. Хицæн ныхас цыд электрон транспортыл. Раздæр нысан кодтой троллейбусты куыст сног кæнын, фæлæ ныртæккæ транспортон инфраструктурæ ацы транспорты хуызæн арæзт нæу. Уæлдай æргом ма аздæхтой трамвайты эксплуатацимæ. Нæ республикæйы тесты хуызы ацыд фыццаг ног вагон. Нысан кæнынц 28 ахæм составы балхæнын.
