Се ппæты номыл дæр 1975-æм азы хъæуы фæзынд цыртдзæвæн
Хъæбатыртæ нæ мæлынц. Æхсæрысæрæй æмæ Кæлухæй Фыдыбæстæйы Стыр хæстмæ ацыд 121 адæймаджы. Уыдонæй сæ фыдыуæзæгыл сæмбæлдысты æрмæстдæр 70-йæ. Се ппæты номыл дæр 1975-æм азы хъæуы фæзынд цыртдзæвæн. Рæстæджы цыдимæ йæ бахъуыд рацаразын, æмæ ныртæккæ уыцы куыст цæуы
Дурæй конд хъæбатыры сурæт дардмæ фæлгæсы. Æхсæрысæры Фыдыбæстæйы Стыр хæсты архайджыты номыл цыртдзæвæн æвæрд ис Кобегкаты уынджы, æмæ хуымæтæджы нæ. Хæстмæ ацыдысты Кобегкаты 7 æфсымæры. Сæ хæдзармæ сыздæхтысты æрмæстдæр 3-йæ.
Цыртдзæвæнæн салдаты фæлгонц равзæрста скульптор Дзанæгаты Чермен. Йæ фарсмæ та, дæсгай хæстонты мыггæгтæ кæуыл фыст сты, ахæм мемориалон фæйнæг. Афтæ, йæ цард райгуырæн зæххы сæрибардзинадæн чи радта, уыдонæн кад кæнынц ног фæлтæртæ.
Рæстæггай цыртдзæвæн фæхъæуы рацаразын. Хъæуы сæргълæууæг уыцы фарсты фæдыл курдиат бахаста районы администрацимæ. Æмæ ныр куыстытæ цæуынц æнæкъуылымпыйæ. Се *ххуысы хай сæм бахастой амалхъом адæм дæр.
Æрæфы районы ма цы иунæг ветеран уыд, уый дæр 2021 азы ахицæн йæ цардæй. Хæмыцаты Хадзырет уыд Толдзгуыны цæрæг. Фыдыбæстæйы Стыр хæсты архайджыты хъæбатырдзинад рох нæу цæрджытæй – сæ нæмттæ зындгонд сты адæмæн, сæ кадæн судзы æнусон арт.
