2018-æм азы эксплуатацийы радтой инфекцион хайады ног корпус.
Æнæниздзинадхъахъхъæнынады рæзты федералон программæйы фæрцы сывæллæтты республикон клиникон рычындоны цæуынц арæзтадон куыстытæ. 2018-æм азы эксплуатацийы радтой инфекцион хайады ног корпус. Ныр куыст цæуы, зæронд бæстыхайы бынаты сывæллæтты консультативон поликлиникæ саразыныл. Уый фæстæ та райдайдзæн федералон программæйы дыккаг къæпхæн.
Сывæллæтты республикон клиникон рычындоны инфекцион хайад адæймаг зонгæ дæр нал бакæндзæн.
Бæстыхай арæзт æрцыди ивгъуыд æнусы. Бындурон цалцæг дзы иу хатт дæр нæ уыди, æрмæст æм иу базылдысты уæлæнгæйтты. Уыимæ дзы иу палатæйы уыдысты 6-ай, 8-ай сывæллæттæ. Уый иу, фæлæ ма дзы тæссаг уыди ноджыдæр æндæр хæцгæнизтæй дæр. 2018-æм азы эксплуатацийы радтой инфекцион хайады ног корпус. Уæд нысангонд æрцыди, зæронд бæстыхай райхалын кæй хъæуы, уый, йæ бынаты та йын скæнын сывæллæтты консультативон поликлиникæ.
Бæстыхай арæзт æрцæудзæни нырыккон домæнтæ æмæ технологитæм гæсгæ, зæгъынц аразджытæ. Поликлиникæ раздæр уыди соматикон корпусы. Ам дæр цæуынц арæзтадон куыстытæ.
Зæронд дыууæуæладзыгон арæзтады бæсты дзы уыдзæни ног æртæуæладзыгон бæстыхай. Иннæ къуыри йын райдайдзысты бындур æвæрын.
Куыстытæ уыдзысты стыр, уымæ гæсгæ дзы фæрæзтæ дæр гыццыл нæ бахъæудзæн. Федералон программæйы фæрцы 5 июны райдыдта стыр реконструкци.
Соматикон бæстыхай æмæ консультативон поликлиникæйы арæзтад аварион корпусы бынаты кæронмæ фæуын нысан кæнынц 2020-æм азмæ. Уый фæстæ райдайдзæн федералон программæ «Æнæниздзинадхъахъхъæнынады рæзт»-ы дыккаг къæпхæн. Арæзт цæудзысты ног, цалцæггон та зæронд объекттæ.
