Лыггæнинаг фарстатæй ма иу – бирæфатерон хæдзæртты цур бырæтты контейнерты аварион уавæр дæр
Полигонты рекультивацийы фарста домы æвæстиаты куыст. Ахæм уавæры сты æнæзакъон бырондæттæ дæр, хъыгагæн республикæйы кæнынц фылдæрæй-фылдæр, уый та æвзæрырдæм зыны экологийыл. Лыггæнинаг фарстатæй ма иу – бирæфатерон хæдзæртты цур бырæтты контейнерты аварион уавæр дæр. Ацы фарстатыл куыст куыд цæуы, уый тыххæй радзурдзæн Сокаты Фатимæ.
Суанты Джульетæ Гагарины уынджы 65-æм хæдзары цæры æнусы рдæг. Куыд зæгъы, афтæмæй бырæтты фарста у бирæазон. Цæрджытæ хъаст кæнынц æнæзæрдæмæдзæугæ тæф дзы кæй кæны, уымæй, стæй контейнерты уавæрæй. Аварион уавæры сты бырæтты камерæтæ. Баххуыс кæныны тыххæй курдиæттæ бахастой хæдзæртты разамынддæттæг компанимæ. Фæлæ фарста йæ бынаты лæууы æмæ змæлгæ дæр нæ кæны.
Ныр зæронд контейнертæ ивынц ногтæй, уæлдæртехнологонтæй. Æвæрд цæуынц хæдзæрттæм хæстæг территориты. Регионалон оператор «Эра» балхæдта 100 контейнермæ хæстæг, æдæппæтæй 1 милуан сомæн. Рагагъоммæ сын бацæттæ кодтой бынæттæ. Бирæ бынæттæ раст конд кæй не сты, уымæ гæсгæ ног контейнертæ дæр тагъд рæстæджы ныппырх уыдзысты, зæгъы регионалон оператор «Эра»-йы санитарон инспекторты хицау Цхуырбаты Георгий. Горæты хæдзæртты хицæутты æмбалад æмæ хæдзæртты разамынддæттæг компаниты минæвæрттимæ специалисттæ фембæлдысты мæйы размæ. Куыд баныхас кодтой, афтæмæй камерæтæм хæстæгдæр рæстæг базилдзысты. Ныр алы бацæуæны цур дæр æвæрд æрцыди иу ног контейнер. Бырæттæ ласынц алы райсом дæр, бæлвырд рæстæг. Хъæбæр коммуналон хауæддзæгтæ контейнеры цур æвæрæн нæй.
Ныртæккæ куыстытæ цæуынц горæты Цæгат-Ныгуылæн зылды. Уый фæстæ контейнертæ баивдзысты Ирыстойнаг, Промышленнон æмæ Фæстерчы зылды дæр.
