Нывгæнджытæ Наталия æмæ Мария Арендт Пушкины номыл нывкæнынады аивæдты паддзахадон музейы Цæгат-Кавказаг филиалмæ сластой 40 сфæлдыстадон куысты
«Æнусон Пушкин. Арендты хоты таурæгътæ». Дзæуджыхъæуы байгом номыдзыд поэты райгуырды 225 азы кадæн проект. Нывгæнджытæ Наталия æмæ Мария Арендт Пушкины номыл нывкæнынады аивæдты паддзахадон музейы Цæгат-Кавказаг филиалмæ сластой 40 сфæлдыстадон куысты. Конд сты алыхуызон, æмхæццæ техникæты. Экспозицийы – скульптурæтæ, нывкæнынад, нывхуыд æмæ арт-объекттæ. Наталия æмæ Мария сты императорон дохтыр Николай Арендты фæдонтæ. Уый архайдта Пушкины аирвæзын кæныныл, дуэлы куы фæцæф, уый фæстæ. Поэты трагикон мæлæт сæ бинонты историимæ баст кæй у, уый хоты сразæнгард кодта, уырыссаг литературæйы генийы кадæн куыстыты сери скæнынмæ. Равдысты концепци у хъазт-фантази. Сæ куыстыты нывгæнджытæ баиу кодтой поэты цардæй æцæг æмæ кæй æрхъуыды кодтой, ахæм цаутæ. Уыцы эпизодтæй иу хуыйны «Ценная бандероль». Уым хотæ сæ фыдæлæн дæттынц пенициллин, цæмæй уый аирвæзын кæна номдзыд поэты. Проектыл цæуы 10 азы. Фыццаг хатт экспозици равдыстой Пушкины хæдзары Лондоны. Уæдæй фæстæмæ уыд бирæ горæтты. Уыцы азтæм равдыст баххæст кодтой ног куыстытæй. Цымыдисаг экспозици фенæн уыдзæн 10-æм октябрьмæ.
