Ивгъуыд аз Дзæуджыхъæуы 4-æм поликлиникæйы, национ проектмæ гæсгæ, медицинон æркаст ацыдысты 53 мин адæймаджы
Адæймаг йе нæниздзинадмæ куыд кæсы, уымæй аразгæ у йæ царды хæрзхъæддзинад. Æппæт анализтæ раттын æмæ æмбæлгæ консультаци райсыны фадат ис æрвылазон диспансеризацийы фæрцы. Ивгъуыд аз Дзæуджыхъæуы 4-æм поликлиникæйы, национ проектмæ гæсгæ, медицинон æркаст ацыдысты 53 мин адæймаджы. Бæлвырддæр хабæрттæ Хъайтмазты Дзерассæйы сюжеты.
Туджы сæкæры æмæ холестерины æмвæзад сбарын, кардиограммæ скæнын, артериалон æлхъывдад сбарын æмæ онкологон низтæ ис æви нæй, уый сбæрæг кæнын. Æппæт ацы иртæстытæ скæнæн ис диспансеризацимæ гæсгæ. Азæй-азмæ профилактикон медицинон æркаст ацæуы фылдæр адæм. Дохтыртæ сæрмагонд æргом здахынц онкологон низтæм. Уыдон азæй-азмæ фылдæр кæнынц, зæгъы Дзæуджыхъæуы 4-æм поликлиникæйы дохтыр-онколог Огъуаты Алыксандр. Комсплексон иртæстытæ æххуыс кæнынц фыдхъæд рæсыднизтæ райдайæн къæпхæнтыл сбæрæг кæнын.
Диспансеризаци арæзт у 2 къæпхæнæй. Фыццагмæ гæсгæ æххæстгонд цæуынц пациентты анкетæтæ сæ хъæстытæ сбæрæг кæнынæн. Уый фæстæ хъæуы радтын анализтæ æмæ райсын терапевты консультаци. Иртæстыты хатдзæгтæм гæсгæ, кæд бахъæуа, уæд пациенты арвитынц профилон дохтыртæм.
Фарон 4-æм поликлиникæйы диспансеризаци ацыд 53 мин адæймагæй фылдæр. Иртæстыты хатдзæгтæм гæсгæ рабæрæг 977 алыхуызон низы. 2024-æм азы ма сфидар кодтой ног практикæ – диспансеризаци куысты бынаты. Адæймагæн поликлиникæ бабæрæг кæныны фадат куы нæ уа, уæд æм специалисттæн бацæуын у сæхи бон.
Ацы аз диспансеризаци райдыдта 1-æм январы. Пъланмæ гæсгæ йæ хъуамæ ацæуой 285 мин хистæры æмæ 150 мин сывæллонæй фылдæр.
