Кæм райдыдта, уыцы регионты хсæн фыццаг у Цæгат Ирыстон.
Æппæт бæстæйы цæуы Ног азы бæрæгбоны агъоммæ хæрзаудæн акци «Бæллицты заз бæлас». Кæм райдыдта, уыцы регионты хсæн фыццаг у Цæгат Ирыстон. Акцимæ йе вæрæн бахаста республикæйы разамонæг Битарты Вячеслав. Хицауады Хæдзары цы заз бæлас ис, уым парламенты, хицауады уæнгтæ, бынæттон хицаудзинады оргæнты кусджытæ равзæрстой фæйнæ иу бæллицы, æмæ сæ æнæмæнг сæххæст кæндзысты. Бæрæгбоны заз бæлас аивгонд у 40 æрвыстæгæй. Ныфыстой сæ сидзæр сывæллæттæ, стæй йе нæниздзинад хъыгдард кæмæн у, ахæм, æмæ фæкæсынхъуаг бинонтæй сабитæ. Сывæллæтты бæллицтæ сты алыхуызон. Иутæ Митын Дадайæ курынц куклатæ, хъазæнтæ, споривон кусæнгæрзтæ, иннæтæ та суанг хæдтæхæгыл атæхын. Бæллицты заз бæлас аразын тынг хорз хъæппæрис у, загъта Битарты Вячеслав. Уымæн æмæ фадат дæтты æппæтæй хуыздæр адæмæн æххуыс кæнынæн — кæстæртæн. Уыдон та сты нæ фидæн.Æмæ сын æххуыс кæнын у нæ алкæйы хæс дæр. Республикæйы разамонæг сæххæст кодта 7-аздзыд Гæгуылаты Тамерланы бæллиц. Лæппуйы фæндыд лæварæн синтезатор райсын. Битарты Вячеслав ын уымæй зæрдæ бавæрдта. Уый размæ та ма Ног азы фидауцæй райста ноджыдæр æртæ курдиаты. Уым сабитæ курынц ирон фæндыр, сывæллæтты æфсæн фæндаг æмæ хи уаты цалцæг. Хицауады сæрдар Тускъаты Таймураз та сæххæст кæндзæн 11-аздзыд Арина Погосяны бæллиц. Уый ракуырдта спортинвентарь. Ног азы лæвæрттæ ракæндзысты вице-премьертæ Дзанайты Барис, Азымты Иринæ, Томайты Ирбег æмæ иннæ бæрнон кусджытæ дæр. Зæгъдзыстæм ма уый дæр, æмæ акци «Бæллицты заз бæлас» арæзт æрцыд æппæтуæрæсеон проект «Мечтай со мной» æххæст кæнгæйæ. 2018-æм азы хаст æрцыд президенты программæ «Уæрæсе — гæнæнты бæстæ»-мæ, æмæ йын радтой федералон статус. Афæдзмæ нæ бæстæйы сæххæст кодтой 450 сидзæр сывæллоны бæллиццы.
