Фæлæ æххæстæй скусдзæн ног сезоны
Æппæт сезонты кусæг туристон-рекреацион комплекс «Мамысон» официалон æгъдауæй гом æрцыд Цæгат Ирыстоны. Фæлæ æххæстæй скусдзæн ног сезоны. Афтæ фехъусын кодта Уæрæсейы экономикон рæзты министр Максим Решетников. Уыд кадджын мадзалы уазæг. Уæвгæ та ацы цау схонæн ис егъау æнтыстдзинадæй, куыд нæ республикæйæн, афтæ æппæт Цæгат Кавказæн дæр. Ирд æмæ рæсугъд бæрæгбон рауад Мамысонгомы. Бацин ыл кодтой Цæгат Ирыстоны цæрджытæ æмæ уазджытæ. Программæйы уыдысты ирон кæрдзынты фестиваль, республикæйы сфæлдыстадон коллективты равдыстытæ. Проект байгом кæныны кадджын мадзалы архайдтой республикæйы Сæргълæууæг Сергей Меняйло, Кавказ.РФ-ы генералон директор Андрей Юмшанов, Уæрæсейы президенты æххæстбарджын минæвары хæдивæг Цæгат Кавказы федералон зылды Владимир Надыкто. Атезгъо кодтой ауындзгæ фæндагыл, федтой станцæ «Зæрæмæг 1»-ы фæз, æмæ дарддæр ацыдысты станцæ «Зæрæмæг 2»-мæ. Туристон комплексы арæзтад фæуынмæ хъавынц 2030-æм азмæ, – загъта Сергей Меняйло.. Фæлæ ныр дæр туристтæн фадат уыдзæн нырыккон хæххон трассæтыл ацæуынæн, алæмæты рæсугъд æрдзы нывтæ фенынæн, панорамон кафетæ æмæ фысымуттæ бабæрæг кæнынæн.
