Федтой, бындурон цалцæг дзы куыд цæуы, уый
Радон рейды рацыдысты Æппæтуæрæсеон адæмон фронты регионалон хайады активисттæ. Бабæрæг кодтой республикæйы цалдæр районы скъолатæ. Федтой, бындурон цалцæг дзы куыд цæуы, уый.
Ног ахуыры аз ног цалцæггонд бæстыхайы райдайын. Куырттаты скъолайы спортивон зал йæ хуыз аивта. Баивтой йын йæ сæр, сраст кодтой къултæ, бауагътой йæм хъарм. Сцалцæг кодтой спортивон кусæнгæрзты уат дæр, сног кодтой дуæрттæ. Бындурон цалцæг ацы скъолайы цыди фынддæс азы размæ. Ныр та дзы уыдзæн нырыккон бæстыхæйттæ дæр. Куыстытæ райдыдтой майы астæу. Фæуын та сæ нысан кæнынц сентябры онг.
Зæгъæн ис, æмæ йæ ахуырдзаутæ суазæг кæнынмæ ног цалцæггондæй цæттæ у Ног Бæтæхъойы скъола дæр. Спортивон залы ма баззад инвентарь сæвæрын, æмæ пъолы уæлцъар баивын. Цалдæр боны размæ тыхджын дымгæ бæстыхайы сæр ахаста. Фæлæ бынæттон администраци зæрдæ бавæрдта фарста алыг кæнынæй.
Раздзоджы спортивон зал та уыди кæлæддзаг уавæры. Кусджытæ базылдысты цармæ æмæ къултæм, баивтой пъол.
Объект нысан кæнынц æмгъуыдæй раздæр раттын. Æппæтуæрæсеон адæмон фронты минæвæрттæ аргъ скодтой куыстыты хæрзхъæддзинадæн.
Æппæтуæрæсеон адæмон фронты активисттæ дарддæр дæр бæстон цæст дардзысты республикæйы спортивон залты уавæрмæ.
