Фарон фæззæджы, æхсæнадон кусджыты хъæппæрисæй ам ныссагътой 125 сырх тулдз бæласы талайы
Æппæтуæрæсеон адæмон фронты активисттæ канд хæдзæртты кæртытæм нæ кæсынц, фæлæ ма номарæн æмæ æхсæнадон бынæттæм дæр. Ацы хатт абалц кодтой Горæтгæрон районмæ, æмæ базылдысты Хъолайы цъитийы амæттæгты номыл мемориалы алфамбылай территоримæ. Фарон фæззæджы, æхсæнадон кусджыты хъæппæрисæй ам ныссагътой 125 сырх тулдз бæласы талайы. Ацы бæлæстæ хуымæтæджы нæ равзæрстой. Тулдз тынг фæразон у зианхæссæг æрдзон фæзындтæм, стæй ма уазæлттæн дæр у фæразон. Фæлæ, хъыгагæн, се ппæт талатæ нæ фæхæцыдысты, æмæ ныр сæ бынаты садзынц ногтæ. Æппæтуæрæсеон адæмон фронты минæвæрттæ рæстæгæй-рæстæгмæ сæ цæст фæдарынц бæлæсты уавæрмæ. Фæсивæдон къордимæ, стæй æфсæнвандаджы техникумы студенттимæ иумæ радон хатт саив кодтой территори майы бæрæгбæтты агъоммæ. Ахæм куыст кæндзысты дарддæр дæр. Æхсæнадон организацийы активисттæ ма нысан кæнынц Фыдыбæстæйы Стыр хæсты цыртдзæвæнтæм базилын.
