Специалисттæ æркастысты, сывæллæтты цы уавæрты дарынц, уымæ
Æппæтуæрæсеон адæмон фронты регионалон хайады активисттæ рацыдысты радон бæрæггæнæн рейды, æмæ федтой, фæлладуадзæн лагерьтæ куыд цæттæ сты, уый. Специалисттæ æркастысты, сывæллæтты цы уавæрты дарынц, уымæ. Бæстыхæйтты санитарон уавæрмæ фиппаинæгтæ не рхастой. Стыр æргом аздæхтой хойраджы фарстамæ. Алцæуыл дæр бæстондæр æрлæудзæн Касаты Наирæ.
Æрлæууыди скъоладзауты уарзондæр рæстæг. Бирæтæ фæнд кæнынц сæ рæстæг лагерты æмæ пансионатты арвитын. Нырма уал республикæйы эпидемиологон уавæр фадат дæтты сывæллæттæн фæлладуадзæн мадзæлттæ скæнынæн.
Сывæллæтты лагерь «Звездочка» ацы аз æнхъæлмæ кæсы фæлладуазджыты 5 фæлтæрмæ. Рæзгæ фæлтæрæн дзы бацæттæ кодтой цымыдисаг æмæ ахадгæ программæ. Бæрнон цæстæнгас дарынц зынгсирвæзтыты системæмæ.
Сæрдыгон лагерты уавæр сбæрæг кæныны тыххæй мониторинг скодта æппæтуæрæсеон адæмон фронт. Специалисттæ æркастысты сывæллæтты цы уавæрты дарынц, уымæ. Бæстыхæйтты санитарон уавæрмæ фиппаинæгтæ не рхастой.
Æхсæнады уæнгтæ бæрæг кæнынц алцыдæр, рохуаты ницы уадзынц. Стыр æргом здахынц сабиты хæринаджы хъуыддагмæ.
Зæрдæмæдзæугæ меню бацæттæ кодтой фæлладуадзæн лагерь «Тæмисчъы» дæр. Æхсæнады минæвæрттæ сæ бабæрæг кодтой сихор афон.
Сывæллæтты реабилитацион центры ацы азы сæрды фыццаг фæлтæры сæ фæллад уадзынц180 адæймаджы. Ис сын æппæт хъæугæ уавæртæ æмæ фадæттæ. Сæ рæстæг æрвитынц пайдаимæ, бацæттæ сын кодтой ахуырадон программæ дæр. Дзæбæхгæнæн центры фæлладуадзджытæн бацæттæ кодтой тренажерты комплекс. Ам сывæллæттæн гæнæн ис се спортивон цæттæдзинадыл æфтауынæн. Тæмисчъы ацы аз хъуамæ сæ фæллад суадзой 4 фæлтæры. Ам хорз уавæртæ ис, се нæниздзинад цудыд кæмæн у, ахæм сывæллæттæн дæр.
Фæлæ зæгъын хъæуы уый, æмæ лагерты разамынд цæттæ сты эпидемиологон ивддзинæдтæм дæр. Хъуыддаг та куы скарз уа, уæд гæнæн ис, æмæ сæ æхгæнгæ дæр скæндзысты. Ныр та уал хъомылгæнджытæ архайынц æппæт тыхтæй, фæсивæдæн аккаг фæлладуадзæн сæрд бацæттæ кæныныл. Æмæ сын æнтысгæ дæр кæны.
