Уым федтой, хæхбæсты ног фельдшерон-акушерон пункттæ куыд кусынц, стæй цавæр зындзинæдтыл æмбæлынц, уый. Æмтгæй райсгæйæ, кусæг балцæй баззадысты разыйæ
Æппæтуæрæсеон адæмон фронты активисттæ рацыдысты радон бæрæггæнæн рейды, æмæ кусæг балцы уыдысты Дыгургомы. Уым федтой, хæхбæсты ног фельдшерон-акушерон пункттæ куыд кусынц, стæй цавæр зындзинæдтыл æмбæлынц, уый. Æмтгæй райсгæйæ, кусæг балцæй баззадысты разыйæ. Цы фиппаинæгтæ рхастой, уыдон та арвитдзысты бæрнон структурæтæм. Ахæм рейдтæ арæзт æрцæудзысты республикæйы иннæ районты дæр. Бæлвырддæр радзурдзæн Гæджиты Сослан.
Æхсæрысæры цæрджытæ медицицнон æххуыс арæх бацагурынц. Алы бон дæр фельдшер æркæсы дыууын адæймагмæ. Иутæ сæ туджы æлхъывдадæй тыхсынц, иннæтæ та хостæм æрбацæуынц. Фельдшерон-акушерон пункты афтек хъуамæ фæзындаид проектмæ гæсгæ, фæлæ дзы ныридæгæн нæма ис. Фельдшермæ ис лицензи, фæлæ хостæ кæм дара, ахæм бынат нæй.
Уæвгæ Æхсæрысæры афтек никуы уыди. Раздæр препараттæ æлхæдтой медицинон пункты зæронд бæстыхайы. Абон та ахæм фадат нæй. Хъæуы цæры цыппар сæдæ адæймаджы. Сæ фылдæр сты ацæргæ. Æмæ сын æндæр гæнæн нæ вæййы, æмæ хостæм ацæуынц Цыколамæ.
Ацы фельдшерон-акушерон пункт та ис Стыр-Дыгуры. Нымад у хæхбæсты æппæтæй бæрзонддæр медицинон объектыл. Лæггад кæны хæстæгдæр хъæуты цæрджытæн. Уый дæр бабæрæг кодтой Æппæтуæрæсеон адæмон фронты активисттæ. Ам ис æппæт æмбæлгæ нырыккон кусæнгæрзтæ. Цух æййафынц æрмæстдæр афтекæй æмæ интернет-бастдзинадæй.
Назырты Ларисæ кусы дыууæ фельдшерон-акушерон пункты, иу Дзинагайы иннæ та Стыр-Дыгуры. Æрæфы районмæ медик кусынмæ бацыд, программæ «Земский фельдшер» æххæст кæнгæйæ. Фæлæ æхсæнадон кусджытæ ахæм уынаффæ банымадтой æгæр бæрноныл. Дыууæ пунктæн лæггад кæнын зын хъуыддаг у.
Æппæтуæрæсеон адæмон фронты активисттæ бабæрæг кодтой 3 объекты. Æмтгæй райсгæйæ, кусæг балцæй баззадысты разыйæ. Цы фиппаинæгтæ рхастой, уыдон та арвитдзысты бæрнон структурæтæм.
Ахæм рейдтæ арæзт æрцæудзысты республикæйы иннæ районты дæр. Уымæй дарддæр ма æхсæнадон кусджытæ сæ цæст дарынц, ног фельдшерон-акушерон пункттæ куыд арæзт цæуынц, уымæ. Ацы аз фæзындзысты Мацутæйы æмæ Махческы.
