Интерактивон картæйыл цы фæндæгтæ фæбæрæг кодтой, уыдонæй сцалцæг кодтой 18
Æппæтуæрæсеон адæмон фронты цæгатирыстойнаг хайады эксперттæ бахыгътой пырх фæндæгты картæйы проекты радон бæрæггæнæнтæ. Интерактивон картæйыл цы фæндæгтæ фæбæрæг кодтой, уыдонæй сцалцæг кодтой 18. Фæндæгтæ куыд цалцæггонд æрцыдысты, уый адæмон фронты минæвæрттæ федтой журналисттимæ. Разыйæ баззадысты цалдæр уынджы уавæрæй. Уæ зæрдыл уын æрлæууын кæндзыстæм — ныртæккæ адæмон фронты интерактивон фæрæзы фæбæрæг кодтой 221 пырх фæндаджы. Сæ иумæйаг дæргъ у 143 километры. Уыдонæй уал бындурон цалцæг скодтой 120 объекты. Бæлвырддæр радзурдзæн Бокоты Виктория.
Раздæры дзыхъхъытæй ма баззадысты мысинæгтæ æмæ фароны къамтæ. Ныртæккæ та ацы уаццаг у дæнцæгæн хæссинаг. Æмраст асфальт, ног бордюртæ, фæндаггон нысантæ. Нальчикскийы уынг нырæй фæстæмæ нал ис нæ республикæйы пырх фæндæгты рейтинджы.
Фæндаггон зындзинæдтæ фесты Реданты шофыртæн дæр. Сæйраг уынг сцалцæг кодтой фарон. Æмæ йæм ацы хатт рейды кæсынц ноджы бæстондæр. Æхсæнадон кусджытæ аргъ скодтой фæндæгты уæлцъарæн, къахвæндæгтæн æмæ бордюртæн.
Пырх фæндæгты хыгъд сбæрæг кæнынц цæрджытæ сæхæдæг, æмæ сæ бахæссынц интерактивон картæмæ. Ныртæккæ дзы ис нæуæдз фондз цалцæггæнинаг фæндаджы. Проект царды уадзыны мгъуыдмæ уал сцалцæг кодтой сæдæ дыууын æхсæз уаццаджы.
Æппæтуæрæсеон адæмон фронты активисттæ бæстон кæсынц республикæйы цæрджыты хъæстытæм. Дыууæ мины дыууынæм азы Дзæуджыхъæуы сцалцæг кодтой æстдæс фæндаджы. Сæ хæрзхъæддзинадæй æхсæнадон кусджытæ баззадысты разыйæ. Уый та ууыл дзурæг у, æмæ пырх фæндæгты картæйы ацы уаццæгтæ нырæй фæстæмæ нал уыдзысты.
