Горæтты сæйраг уынгтыл традицион цыды бæсты мадзал арæзт æрцæудзæн æндæр хуызты
Æппæтуæрæсеон акци «Æнæмæлгæ полк» ацы аз аивта. Горæтты сæйраг уынгтыл традицион цыды бæсты мадзал арæзт æрцæудзæн æндæр хуызты. Се *хсæн: машинæтыл дугъ ветеранты хуызистытимæ, æмæ æндæр цымыдисаг мадзæлттæ. Бæрæгбонмæ куыд цæттæгонд цæуы, уый тыххæй радзурдзæн Хъайтмазты Дзерассæ.
Алцыдæр кæнын, цæмæй ацы адæмы, сабыр цард чи балæвар кодта, уыдоны цæсгæмттæ алчидæр зона. Цæгат Ирыстоны гуманитарон æмæ социалон иртæстыты институты бæстыхайы разуындыл хъæбатырты сурæттæ. Кæддæр наукæйæн чи лæггад кодта, уыдон бахъуаджы сахат, иу уысм дæр нæ дызæрдыггæнгæйæ, араст сты Фыдыбæстæ фашисттæй хъахъхъæнынмæ. Институты чи куыста, уыцы ветеранты портреттимæ, ныры кусджытæн сæ хæстæджытæй фронтовиктæ чи уыд, уыдоны хуызистытæ дæр.
Сæ цæсгæмттæм кæсгæйæ, бæлвырд æмбарыс – æнæ ацы адæмæй сабыр цард нæ уыдаид. Сæ хъæбатырдзинад æнусон у. Афтæ сæ намыс дæр. Ныр цалдæр азы базарадон-экономикон колледжы саразынц хи æнæмæлгæ полк. Рагагъоммæ йæм сæрмагондæй фæцæттæ кæнынц.
Ацы аз Фыдыбæстæйы Стыр хæсты ветеранты хуызистытимæ сæрмагонд æфсæддон операцийы архайджыты портреттæ дæ – абон йæ бæстæйы сæрибардзинад хъахъхъæнынмæ чи сыстад, уыдоны. Сты 200-йæ фылдæр. Уыдоны тыххæй информаци сæмбырд кæнынæн чысыл рæстæг нæ бахъуыд. Ацы хъуыдаджы сæ хистæртимæ архайдтой студенттæ дæр.
Æмæ кæд ацы аз Æнæмæлгæ полчы традицион цыд нæ уыдзæн, уæддæр хъæбатырты нæмттæ æнæрхъуыдыйæ нæ баззайдзысты. Акци арæзт æрцæудзæн алы хуызты.
Ацы бонты рекламон агентадты куыст ноджы фылдæр ис. Ветеранты хуызистытæ стыр форматы ныммыхуыр кæнын кæй фæнды, уыдон бирæ сты. Маргарита Шишкина сфæнд кодта йæ хъæбатырты портреттæ йæ машинæйыл бакæнын, цæмæй Стыр Бæрæгбоны Дзæуджыхъæуы уынгтыл цæуа семæ – ацы боны сæйраг адæмимæ.
Уæлахизы бонмæ фæцæрын кæмæн нæ бантыст, уыцы æвзонг танкист. Йæ хуызист ын ныр фендзæн æппæт горæт. Æмæ æрмæст уый нæ. Фыдыбæстæйы Стыр хæсты фронтты чи тох кодта, уыцы хъæбатыртæ мингæйттæ сты. Акци «Посмотри на их лица»-йы фæрцы, уыдоны тыххæй уыдзæн алкæйы бон дæр базонын. Хъæбатыр хистæрты намыс бахъахъхъæнын та у абоны фæлтæры сæйраг хæс.
