Дигорайаг скъоладзау Суменаты Елизаветæ йæм рагæй цæттæ кодта йæхи, æмæ йын бантыст йæ курдиат раргом кæнын.
Æппæтуæрæсеон конкурс «Живая классика»-йы финалист фыццаг хатт сси Цæгат Ирыстоны минæвар. Дигорайаг скъоладзау Суменаты Елизаветæ йæм рагæй цæттæ кодта йæхи, æмæ йын бантыст йæ курдиат раргом кæнын. Бакасти дзы Латвийы зындгонд поэты монолог «Я говорю вам – пойте!» Уæвгæ, æрыгон чызгмæ ис бирæ фæндтæ æмæ нысантæ. Кæй зæгъын æй хъæуы, се ппæт дæр баст сты аивадимæ.
Латвийы адæмон поэт Имант ЗиЕдонисы зындгонд монолог «Я говорю вам – пойте!» дигорайаг чызг Суменаты Елизаевтæйæн æрхаста сфæлдыстадон æнтыстдзинад. Не мзæххон скъоладзау сси Æппæтуæрæсеон конкурс «Живая классика»-йы финалист. Ацы уацмыс равзæрста йæхæдæг. Елизаветæ Цæгат Ирыстонæй у иунæг минæвар, конкурсы финалмæ рацæуын кæмæн бантыст, ахæм.
Уæвгæ, Цæгат Ирыстонæй конкурсы архайдтой 3 адæймаджы. Фæлæ, уæлдæр куыд загътам, афтæмæй финалы онг бахæццæ æрмæстдæр Лизæ.Æдæппæтæй «Удæгæс классикæйы» архайдтой 2 милуаны æмæ 500 скъоладзауы. 5 æвзарæн къæпхæны фæстæ дзы баззади 15 финалисты.
Коронавирусы пандемияйы тыххæй конкурсы сæйраг къæпхæнтæ арæзт æрцыдысты онлайн-бастдзинады фæрцы. Конкурс цалынмæ цыди, уæдмæ Лизæйæн тынг æххуыс кодта йæ ахуыргæнæг Ивета Караваева. Йæ хъомылгæнинагæн ахæм æнтыстдзинад кæй бафтдзæн йæ къухы, ууыл дызæрдыг дæр нæ кодта. Уæвгæ та йæ фыццаг хатт федта 3 азы размæ, конкурсы скъолайы къæпхæн куы цыди, уæд.
Æвзарæн къæпхæнты Лизæйы фарс канд йæ хæстæджытæ æмæ хиуæттæ нæ уыдысты, фæлæ, зæгъæн ис, æмæ республикæйы æппæт цæрджытæ дæр.
Суменаты Елизаветæ фидарæй зæгъы, ногæй та кæй раздæхдзæн конкурсы фæзмæ.Уыимæ ацы хатт куыд архайæг нæ, фæлæ куыд бæрнон жюрийы уæнг, афтæ. Цы бафтауæн ма ис ахæм ныхæстæм? Æрмæстдæр арфæтæ æмæ æууæнк, кæй йын бантысдзæн, ууыл.
