Æхсæнадон кусджытæ сбæрæг кодтой Беслæны 4 уынджы. æркастысты фæндæгты хæрзхъæддзинадмæ
Æппæтуæрæсоен адæмон фронты цæгатирыстойнаг регионалон хайады активисттæ радон бæрæггæнæн куыст бакодтой Рахизфарсы районы. Æхсæнадон кусджытæ сбæрæг кодтой Беслæны 4 уынджы. æркастысты фæндæгты хæрзхъæддзинадмæ. Иуты ныридæгæн цалцæггæнæн куыстытæ фесты, иннæты та сты сæ тæмæны. Цавæр хатдзæгтæ скодтой сæ кусæг балцæй, уый тыххæй радзурдзæн Фидараты Маринæ.
Ацы ран ис фиппаинæгтæ æрхæссæн. Люк æвæрд æрцыд, фæндаджы уæлцъарæй зынгæ бындæр.Уый тыххæй æнæмæнг фехъусын кæндзысты подрядон организацийы кусджытæн, зæгъынц Æппæтуæрæсеон адæмон фронты цæгатирыстойнаг хайады минæвæрттæ. Уымæн æмæ уымæй аразгæ у шофырты æдасдзинад. Нырма уал ам цалцæггæнæн куыстытæ цæуынц, æмæ уавæр сраст кæнæн уыдзæн æнцондæр. Æхсæнадон организацийы уæнгтæ ма стыр æргом аздæхтой ног бордюртæм. Сæвæрдтой сæ цæрджыты фæндонтæ хынцгæйæ.
«Пырх фæндæгты картæ»-йы фæндаггон инспекцийы куыст бацыд йæ тæмæны. Æппæтуæрæсеон адæмон фронты минæвæрттæ мониторинг кæнынц Рахизфарсы районы. Сæ куыст аразынц хуымæтæг фæткмæ гæсгæ. Сæйрагдæр у æркæсинаг, адæм сæхæдæг кæй снысан кæнынц, уыцы хъуыддæгтæ, зæгъынц активисттæ. Цæрджытæ сисынц фæндæгты къамтæ, æмæ сæ равæрынц интернеты. Уым ис хъæлæс кæныны фадат дæр. Ацы хатт адæмон фронты уæнгтæ сбæрæг кодтой Беслæны 4 уынджы.
Иуæй-иу участоктыл асфальт ныридæгæн сæвæрдтой, иннæты нырма куыст цæуы. Æппæтуæрæсеон адæмон фронты хæс у алцæмæдæр бæстон цæст дарын. Куыстытæ хъуамæ конд æрцæуой бæлвырд æмгъуыдмæ, стæй, куыд æмбæлы, афтæ.
Проект кусы ныр 3 азы. Уыцы мгъуыдмæ сын бирæ бантыст. Нæ республикæйы «Пырх фæндæгты картæ»-йы снысан кодтой 186 участочы. Уыдонæн се рдæг ныридæгæн цалцæггонд æрцыд.
