Æппын къаддæр 4 мин сывæллоны ацы сæрд бацархайдзысты дзæбæхгæнæн кампанийы. Сæ фæллад суадздзысты стационарон организациты, уыдон та сты 8. Æдæппæтæй та нæ республикæйы реестры сты 125 уагдоны. Ноггонд хыгъд ныммыхуыр кæндзысты 1-æм майы. Уым нысангонд æрцæудзысты цæстдарæн службæты фиппаинæгтæ. Организацитимæ бафысдзысты контракттæ, сывæллæтты æнæниздзинад фæхуыздæр кæныны тыххæй. Стыр æргом аздахдзысты фæлхасадмæ цæстдарды Управленийы амынддзинæдтæм, эпидемиологон уавæр хынцгæйæ. Уагдæттыл сæ иумæйаг хъомысæй æвæрд æрцæудзæн 75% уаргъ. Ацы аз кусдзысты, æрмæстдæр республикæйы территорийы чи ис, ахæм организацитæ. Уыцы куыст цæуы, коронавирусы инфекци ма парахат кæныны тыххæй. Домæнтæ ис, дзæбæхгæнæн объектты чи кусдзæн, уыцы специалисттæм дæр. Хъуамæ сæ алкæмæ дæр уа документ, низы ныхмæ буаргъæдтæ кæй ис, уый фæдыл, кæнæ та вакцинаци кæй ацыдысты, уый æвдисæндар. Фæллойы æмæ социалон рæзты министрады куыд загътой, афтæмæй путевкæтæ лæвар ратдзысты, льготæтæ кæмæ ис, ахæм адæмæн. Уыдон фыццаджыдæр сты бирæсывæллонджын, кæнæ фæкæсынхъуаг бинонтæй сывæллæттæ, инвалидтæ, сидзæртæ æмæ техногенон фыдбылызты хъыгдард баййафæг сабитæ. Профилон сменæты уыдзысты 7 – 14 азы онг, стæй 14 – 17 азы онг сывæллæттæ. Сæрдыгон кампани райдайдзæн 1-æм июны.
