Арæзт æрцыд федералон программæмæ гæсгæ. Фыццаг бакастæй – чысыл бæстыхай, фæлæ æрмæст актон залы ис 100 бынаты
Æрæфы районы Æхсæрысæры кусын райдыдта ног культурæйы хæдзар. Арæзт æрцыд федералон программæмæ гæсгæ. Фыццаг бакастæй – чысыл бæстыхай, фæлæ æрмæст актон залы ис 100 бынаты. Сфæлдыстады центры уæвгæйæ, рæзгæ фæлтæрæн фадат ис кафæн, театралон, адæмон иструментты, æрмдæсныйады къордтæм æмæ вокалон секцитæм цæуынæн. Ирон фæндыр, балалайкæ, доул æмæ æндæр музыкалон инструменттæ рæхджы фæзындзысты культурæйы артдзæсты. Ныр та уал фæсивæд сæхи хъарутæй самал кодтой кусæнгрæзтæ, хъæлдзæг хъазт «Диссæгты быдырæй» хъæзынæн. Уæвгæ та ног бæстыхайыл цин кæнынц се ппæт дæр. Зарын æмæ сæм кафын æрцыди уæлдай тынгдæр.
Уый размæ алыхуызон сфæлдыстадон къордтæ æмæ секцитæ куыстой бынæттон скъолайы. Ныртæккæ та сывæллæттæ зæрдиагæй батагъд кæнынц ног бæстыхаймæ. Ам ис нырыккон æмæ хæрзвадат гримгæнæнтæ, библиотекæ. Кæд бæстыхай стыр нæу, уæддæр дзы алцыдæр арæзт у, куыд æмбæлы, афтæ, зæгъы бынæттон хореогрæф. Разы у сæ уавæртæй. Районы культурæйы управлени ма фæнд кæны бæстыхаймæ техникон æгъдауæй æркæсын, æмæ йæ сифтонг æмбæлгæ æрмæгæй кæнын. Афтæмæй æххæст кæндзысты сæ сæйрагдæр хæс – национ традицитæ æмæ æгъдæуттæ хъахъхъæнын, æмæ сæ дарддæр хæццæ кæнын.
