Йæ байгом кæныны кадджын мадзалы архайдта Цæгат Ирыстоны Хицауады Сæрдар Тускъаты Таймураз
Æрæфы районы хъæу Сечеры байгом ног фельдшерон-акушерон пункт. Йæ байгом кæныны кадджын мадзалы архайдта Цæгат Ирыстоны Хицауады Сæрдар Тускъаты Таймураз. Сырх лент алыг кæныны бар дæр уымæн радтой. Медицицнон куыстуат лæггад кæндзæн 500 адæймагæн. Ам ифтонггонд æрцыдысты процедурæтæгæнæн, прививкæтæгæнæн кабинеттæ, сылгоймæгтæн уат, сæвæрдтой дзы сывæллæтты дохтырæн кусæнгæрзтæ дæр. Раздæр фельдшеры бон адæмæн æххуыс кæнынæн нырыккон уавæртæ нæ уыди, нырæй фæстæмæ та хъæуы медицинон æххуысы хæрзхъæддзинад зынгæ фæхуыздæр уыдзæн, зæгъынц бынæттон специалисттæ.
2020-æм азы хатдзæгтæм гæсгæ Æрæфы районы территорийы арæзт æрцыд 7 фельдшерон-акушерон пункты. Ацы аз дæр муниципалон сконды æнæниздзинадхъахъхъæнынады къабазы рæзт фæхуыздæр кæныны куыст цæуы. Нысан кæнынц ног фельдшерон-акушерон пункт саразын Мæцутæйы. Бындуронæй сцалцæг кæндзысты Сырх-Дыгуры амбулатори, æмæ райдайдзысты Цыколайы поликлиникæйы цалцæгггæнæн куыстытæ. Æдæппæтæй республикæйы ацы аз эксплуатацийы лæвæрд æрцæудзысты 36 медицинон объекты.
