Районы рæзты хатдзæгтыл афæлгæст Состранты Жаннæ
Афæдзы кæрон алчидæр скæны хатдзæгтæ йæ сконд мадзæлттæн. Æмæ сын сæ ахадындзинадæн аргъгонд куы æрцæуы бæрзонд æмвæзадыл, уæд та ма уымæй хуыздæр хорз цы фæхъæуы. Æрæфы районы хицауады куысты нæмыг талатæ кæй суагъта, ууыл цин кæнынц æппæт районы цæрджытæ дæр. Се *нтæстдзинæдты фæрцы, Æрæфы районы муниципалон сконд хуыздæрыл нымад æрцыд республикæйы районты хсæн.
Æрæфы районмæ абон куы ракæсæй, уæд дзы цы ногдзинæдтæ конд æцыд уыдоны фенгæйæ, зын баууæндæн у – ахæм уавæрты уыдысты ныры райдзаст районы культурæйы хæдзар, Цыколайы стадион. Дыууæ азмæ дзы бирæ хъуыддæгтæ сæ хуыз аивтой хæссынц æнцойдзинад районы цæрджытæн. Уæдæ æнусы рдæгмæ æхсæнадæн диссаджы хъæугæ æмæ пайдайаг фæлтæртæ цы скъолайæ рацыд, уый искуы æмбæлгæ уагыл бындурон цалцæг скæнын бантысдзæн, ууыл та хъуыды дæр ничи кодта.
Æрæфы районы хъæууон хæдзарады къабаз дæр фæстаг рæстæг фæуæрæхдæр. Дзагуырты Ермак Æрæфы районы зындгонд у куыд зæрдæхæлар зæхкусæг. Йæ бæркад никуы никæмæн бавгъау кодта. Ныр та ма йын бантыст фосдарæн фермæ саразын. Ныр уал дзы ис резерфордаг фосы хуызы 60 хъуджы.
Уæвгæ ацы аз Æрæфы районы хъæууон хæдзарады райрæзтæн лæвæрд æрцыд 14 гранты – 33 милуан соммæ хæстæг. Зæгъын хъæуы уый, æмæ æппæт ацы хъуыддæгтæ кæй сты, район æнæзивæгæй кæй архайы национ проекттæ æмæ алы хуызы федералон программæты, уый фæрцы.
2020-æм азы Æрафы районы фæзынд 7 акушерон пункты, сæ иу Быдыры Дæргъæвсы. Ам цæры 500 адæймаджы. Медицинон æххуыс агурынмæ адæмы цæуын хъуыд сыхаг хъæумæ. Ныртæккæ дзы æвæрд цæуынц кусæнгæрзтæ. Адæмæн лæггад кæнын хъуамæ райдайа рæхджы. Толдзгун æмæ Дæргъæвсы цалцæггонд æрцыдысты культурæйы хæдзæрттæ. Районы стыр куыст конд æрцыд фæндæгтæ фæрæвдзæдæр кæныны хъуыддæджы дæр.
Афæдзмæ Æрæфы районы цы пайдайаг хъуыддæгтæ конд æрцыд, уыдон сты бафæзминаг. Æмæ конд цæуынц куыд алыхуызы æмы алы æмвæзады проектты архайдмæ гæсгæ, афтæ Æрæфы районæй рацæуджыты фæрцы. Районы азы ахсджиагдæр цау у Хæзныдоны хуыйæн фабрикæ кæй байгом, уый. Цы адæм дзы кусынц, уыдон бирæ æзты сæ хæдзæртты æгуыстæй бадтысты.
Азы кæрон та районæн æвзæрст æрцыд ног сæргълæууæг. Ныр ын сæрдариуæг кæны Гъуцъунаты Хъазыбег. Районы раздæры сæргълæууæг Хидирты Батраз та нысангонд æрцыд æрдзон ресурсты æмы экологийы министры хæстæ æххæстгæнæгæй. 2020 азæн хатдзæгтæ кæнгæйæ ма фæбæрæг кæнын хъæуы уый, æмæ æппæт ацы хъуыддæгты фæрцы районæн кæй бантыст фыццаг бынат райсын республикæйы иннæ муниципалон скондты астау. Лæвæрд ын æрцыд дæс милуан сомы. Дызæрдыккаг нæу, ацы æхцаты фæрцы ма районы хорзырдæм ивддзинадтæ кæй æрцæудзæн, уый.