Уый кадæн арæзт цæуынц бирæ мадзæлттæ.
Æрбахццæ кæны ирон адæмы зæххон стъалы, нæ зындгонд рухстауæг Хетæгкаты Къостайы 160 азы бон. Уый кадæн арæзт цæуынц бирæ мадзæлттæ. Æрæджы ирон æвзагмæ ратæлмац кодтой йæ хъуыстгонд киноныв «Фатимæ». 14 азмæ фыццаг премьерæ сæвæрдтой бæхты театр «Нартæ» дæр. Къостайы райгуырды 160 азы боны кадæн бацæттæ кодтой спектакль «Бæрæгбон хæхты». Куыд рауад, уый федта не сфæлдыстадон къорд, æмæ бæлвырддæр радзурдзæн Моргуаты Ладæ.
Алцыдæр, нæ рагфыдæлты рæстæг куыд уыди, афтæ. Гутонтæ, хосы мæкъуылтæ æмæ хуымæтæг хохаг адæм амайынц Иры намысы мæсыг.
Бæрæгбон хохы, ацы спектаклæй ногæй байгом Цæгат Ирыстоны бæхты театр «Нартæ». Гом арвы бын зæлынц Къостайы ныхæстæм гæсгæ фыст зарджытæ, æмдзæвгæтæ, адæммæ цæуы цин кæнын. Ахæм уыд йæ хъуыды сценарийы автор Кокайты Тотразæн. Театры разамонæг СихъотыТимуримæ æрцыдысты иу хъуыдымæ æмæ ныр æцæг бæрæгбон сарæзтой театрдзаутæн.
Цы зæгъынмæ хъавыд автор. Йæ хъуыды у, цæмæй адæм комгай ма дих кæной, фæлæ æмархайд æмæ мзондæй уой кæрæдзимæ хæстæгдæр. Уый театрдзаутæм бахæццæ кодтой нæ республикæйы зындгонд артисттæ. Сæйраг роль, Къостайы сурæт та сæрæзта Хъараты Алыксандр.
Бæхты театрæн, зæгъæн ис æмæ радтой дыккаг цард. Æмæ та раздæрау актертæ æмæ бæхтæ сæ архайдæй фæндаг ссардтой адæмы зæрдæтæм.
Спектакль æвдыст цæуы изæрæй. Фæлæ ирд декорацитæ, рухсытæ, æртытæ спектакль скодтой ноджы райдзастдæр. Уæдæ бæхтæ сæхæдæг дæр актертæ кæй сты, уый та у ноджы диссагдæр. Фæлæ цæмæй ахæм нывæфтыд сæрæза, уый та канд актерты фæлтæрдзинад æмæ курдиатæй аразгæ нæу, фæлæ ма боныхъæдæй дæр.
13 азы театр æнхъæлмæ каст ацы бæрæгбонмæ æмæ цæмæй æнкъарæнтæ ма фæмыныг уой, ууыл бацархайдта боныхъæд дæр. Ирд хъарм изæр бирæ азты баззайдзæн, чи йыл бакуыста, æмæ кæмæн бакуыстой, уыдоны зæрдæты.
