Æхсæз гектары территорийы æрбынат кодтой сывæллæттæн хъазæн фæз æмæ спортивон комплекс, къæйдуртæй фонтан, арвы бын кинотеатр
Æрыдоны байгом кодтой, Тæргайдоны былгæрон цы фæлладуадзæн бынат сарæзтой, уый. Æхсæз гектары территорийы æрбынат кодтой сывæллæттæн хъазæн фæз æмæ спортивон комплекс, къæйдуртæй фонтан, арвы бын кинотеатр. Былгæрон сфидауын кодта Зæнджиаты Таймуразы конд арт-объект «Уацамонгæ». Проект сæххæст кæнынæн бахъуыдис сæдæ дыууын милуан сомы. Æхсæнадон территори саив кодтой, Æрыдон хæрзвадат горæты проектты конкурсы кæй фæуæлахиз, уый фæрцы. Уый размæ та конкурсы руаджы базылдысты Мæздæджы Уæлахизы паркмæ, стæй Алагиры аргъуаны алыварс территоримæ. Иннæ аз ма сыл бафтдзæн дыууæ тыгъдады — Беслæны фæлладуадзæн парк æмæ Дигорайы сæйраг сквер.
