Ирыстоны музыкалон аивады йæхи сæрмагонд хæзнадон кæмæн ис, нæ уыцы зындгонд æмæ ирд курдиаты хицау, национ аивады дæснытæй иуы цардвæндаг æмæ сфæлдыстадыл афæлгæст сарæзтой аивады кусджытæ.
Æрыдоны районы культурæйы Галуаны арæзт æрцыд Ирыстоны музыкалон сценæйы легендæ – Мыстулаты Иринæйы номарæн изæр. Иринæ 1957-æм азы фæуæлахиз республикон конкурс-æркасты. Рамбылдта дзы фыццаг приз – ирон фæндыр. Зæгъæн ис, æмæ уæд фæндаг ссардта жюрийы æмæ аивадуарзджыты зæрдæтæм. Адæм æй бауарзтой, æмæ уыцы уарзондзинад æппындæр нæ мынæг кæны. Уымæн æмæ зындгонд фæндырдзæгъдæг йæ цард балæвар кодта Ирыстоны сфæлдыстады райрæзтæн. Уыцы, стæй иннæ сарæзт хъуыддæгты тыххæй йæ хъуыды кæнынц йæ райгуырæн районы. Номарæн изæры уыд не сфæлдыстадон къорд дæр, бæстондæр хабæрттæ нæм фæхæццæ кæндзæн Сосранты Жаннæ.
Æрыдоны районы Культурæйы галуаны та айхъуыстысты, номдзыд фæндырдзæгъдæг, УФ-йы сгуыхт æмæ РЦИ-Аланийы адæмон артисткæ Мыстулаты Иринæйы, дзыллæтæн уарзон уацымыстæ йæ мысæн изæры. Ирыстоны музыкалон аивады йæхи сæрмагонд хæзнадон кæмæн ис, нæ уыцы зындгонд æмæ ирд курдиаты хицау, национ аивады дæснытæй иуы цардвæндаг æмæ сфæлдыстадыл афæлгæст сарæзтой аивады кусджытæ.
Номарæн изæры уазджытæ æмæ аивадуарзджытæ зæрдиагæй бакастысты Мыстулаты Иринæйы цард æмæ сфæлдыстадон курдиаты бирæвæрсыгдзинадыл дзурæг документалон кинонывмæ. Номдзыд фæндырдзæгъдæг æртын азæй фылдæр аивады стыр фæндагмæ хуыдта æрыгон курдиатджын фæндырдзæгъдджыты. Арæхстджынæй сын сывæллæтты сфæлдыстады галуаны амыдта фæндырдзагъд æмæ зарды аивады сусæгдзинæдтæ. Ацы хъомыладон артдзæсты разамынд æмæ ахуыргæнджыты номæй Иринæйы мысæн изæры уазджытæ æмæ архайджытæн арфæ ракодтой Пухаты Ларисæ æмæ Чъерджиаты Зæлинæ.
Мыстулаты Иринæ æмæ Хуытыгаты Хъазыбеджы цард ирон аивад æмæ нæ дзыллæйы хорзæхæн нывонд кæй уыд, уый тыххæй номарæн изæры сæ хъуыдытæ загътой фæллойы ветеран Уырымты Хъасболат, газет “Рæстдзинад”-ы хистæр уацхæссæг Баскаты Уырызмæг.
Адæмæн уарзон фæндырдзæгъдæг Мыстулаты Иринæйы зарджытæ æмæ инструменталон композицитæ, йæхи номарæн музыкалон уацмыстæ азарыдысты æмæ ацагътой нæ республикæйы зындгонд зарæггæнджытæ æмæ музыканттæ. Фыссæг газет «Рæстдзинады» уацхæссæг Гасанты Валерий та, æппæт æрбацæуджытæм фæхæццæ кодта, Иринæйы тыххæй цы рæнхъытæ ныффыста, уыдон.
Мыстулаты Иринæйы сфæлдыстадон бынтыл дарддæр æфтауы йæ чызг, Хуытыгаты Маринæ. Куыд зæгъы афтæмæй, йæ ныййарджыты кад æмæ ирондзинадæн ыл уæлдай хæс æвæрынц. Æмæ кусы, сæ фарн сын фæлтæртæм хæццæ кæныныл.
Мыстулаты Иринæйæн канд йе сфæлдыстад нæ хъуыды кæнынц, фæлæ йæ рæдау, фæлмæн уыды ахаст.
Цард цæуы æмæ фарн хæссы, фæзæгъынц. Кæд Мыстулаты Иринæ йæ цардæй ахицæн, уæддæр йæ ном цæры йæ цард цы национ сфæлдыстадæн балæвар кодта, уый къæбицы. Цы йын нæ бантыст саразын, уыдоныл та кусынц йæ фæдонтæ.
Æрыдоны районы Культурæйы галуаны, Мыстулаты Иринæйы мысæн изæрмæ цас адæм æрбацыд, уый та æвдисæн уыд уымæн, æмæ сæ уарзон хистæры курдиат рохгонд кæй никуы уыдзæн, йæ ныффыст фæндыры зæлтæ кæй хъуысдзысты фæлтæрты фæрцы.
