Уый у, æнæ алыг кæнгæйæ операци скæныны нырыккон хуыз
Æрыдоны рынчындоны фыццаг хатт лапароскопийæйы фæрцы операци скодтой мастæн. Уый у, æнæ алыг кæнгæйæ операци скæныны нырыккон хуыз. Ахæм операци скæнынæн кусæнгæрзтæ районы рынчындоны фæзынди 2 азы размæ. Фæлæ цæмæй, операцитæ райдайой кæнын, уый тыххæй ма аппаратурæ хъуыди баххæст кæнын. Адæймаджы цард бахъахъхъæнынæн ахсджиаг операци скодта æрыгон хирург Тауытты Аслан. Йемæ базонгæ не сфæлдыстадон къорд дæр. Ныхасы бар Хъайтыхъты Фатимæйæн.
Мæргъиты Сергей 10 азæй фылдæр фæрæзта йæ рыстытæн. Дохтырмæ бацæуын алы хатт æргъæвта æндæр бонмæ. Тарстис, операцион стъолмæ куы бахауа, уымæй. Радон хатт та йæм приступ куы уыдис, уæд нал бафæрæзта. Нæлгоймаг сфæнд кодта, цыфæндыйæ дæр дохтырмæ бацæуын. Абон Сергей фæсмон кæны, уал азы рыстимæ кæй царди, æмæ раздæр дохтырмæ кæй нæ бацыдис, ууыл.
Рынчындоны раиртæстой, Сергейы масты дуртæ кæй ис, уый. Сисæн сæ нал уыди. Æмæстдæр операци маст æнæхъæнæй сисыны тыххæй. Операци цыди лапароскопийæйы фæрцы. Дыууæ сахаты фæстæ пациент уыди палатæйы.
Дзæуджыхъæуы рынчындæттæн лапароскопийæйы процедурæ ног нæу. Æрыдоны та дзы спайда кодтой фыццаг хатт. Раздæр ацы медицинон кусæнгæрзтæй архайдтой æрмæстдæр рынчынæн диагностикæ скæныны.
Операцийы ног хуыз адæймагæн у æнцондæр. Йæ реабилитаци дæр у тагъддæр. Мæргъиты Сергей рынчындонмæ бахауди 18-æм январы, иннæ бон ын систой йæ маст. Ныридæгæн та хæдзары. Ныр рынчындоны ахæм операцитæ кæндзысты арæхдæр. Ацы къуыри ма ахæм операци скæндзысты иу рынчынæн.
