Ахсджиаг нысан ис ацы хъуыддагæн, ахæм фæрæзтæ хъæуынц æрмæст хæстон уавæрты нæ, фæлæ сабыр царды дæр
Æрыдоны Цæгат Кавказы аграрон технологон колледжы фыццаг хатт арæзт æрцыд, æнæтæхæг авиацион системæтимæ баст технологон практикум. Ахсджиаг нысан ис ацы хъуыддагæн, ахæм фæрæзтæ хъæуынц æрмæст хæстон уавæрты нæ, фæлæ сабыр царды дæр. Практикумы ныхас цыд сæ пайда кæныны тыххæй аграрон æмæ цæрæнуæтты коммуналон хæдзарæдты. Бæлвырддæр радзурдзæн Чехойты Фатимæ.
Раздæр – нырыккон технологитæ, абон та – кусæн фæрæз. Æнæпилотон авиацион системæтæ рацыдысты æхгæд лабораторитæй æмæ систы æрвылбоны царды фæрæзтæ. Сæ пайда кæныныл æрмæст хæстон уавæрты нæ цæуы ныхас. Арæх арвæй æххуыс кæнынц сабыр царды рæстæг. Хъæдты уавæр иртасын, бæлæстыл низтæ кæцы бынæтты стыхджын сты, уыдон сбæрæг кæнын. Ацы аппараттæ дардмæ хорз уынынц, æххæст сты зондæй, æвдисынц æгæрон цымыдисдзинад æрдз хъахъхъæнынадмæ. Практикумы экспертты ныхæстæм гæсгæ, æнæтæхæг авиацион системæтæ æрмæст хъæд иртасынæн нæ хъæуынц, пайда сæ кæнынц энергетикæйы къабазы æмæ арæзтады дæр.
Адæймаг кæмфæнды куы уа, уæддæр æй дрон ссардзæн. Практикумы архайджыты хъуыдымæ гæсгæ æнæпилотон авиацион системæтæ нæ рæдийынц, нæ фæллайынц, цæттæ сты куыстмæ кæцыфæнды рæстæг дæр. Ахæм сты сæ ахсджиаг миниуджытæ. Республикæйы промышленносты æмæ инвестициты министр Атарты Олег фæнысан кодта, æнæтæхæг авиацион системæтæ парахат кæныны хъуыддаджы бæстæ стыр къахдзæфтæ кæй кæны. Тагъд рæстæджы сæ пайда кæндзысты республикæйы куыстуæттæ дæр.
Боны фæткы – æнæпилотон системæтæй пайда кæнын аграрон къабазы æмæ цæрæнуæтты коммуналон хæдзарæдты. Форумы архайджытæй сæ фылдæр теорийы фæстæ сæ зонындзинæдтæ сфидар кодтой практикон ахуырты. Тæхæджы сæрмагонд тренажеры фæрцы аграрон колледжы студенттæ бæрзонддæр кæнынц сæ дæсныйад. Практикумы рæстæг æххæст кодтой инструкторты хæстæ.
Æрлæууыд нырыккон технологиты дуг, зæгъынц специалисттæ. Æнæпилотон авиацион системæтæ регионты парахат кæнын у президенты хъæппæрис. Практикум сарæзтой республикæйы ахуырады æмæ наукæйы министрад æмæ аграрон технологон колледж. Ахуыргæнæндоны директор Моурауты Аланы ныхæстæм гæсгæ, колледж фæнд кæны ацы къабазы йæхимæ ног хæстæ райсын. Араздзæн фадæттæ æнæпилотон авиацион системæты лæггæдтæй æхсæнады царды алы къабæзты пайда кæнынæн.
