Уыимæ бинонты нымæц гæнæн ис æмæ фæфылдæр уа, уымæн æмæ курдиат бадæттæн ис суанг октябрьмæ
Æвдай мин бинонтæ нæ республикæйы райсдзысты дæсгай мин сомы алы сывæллонæн дæр паддзахадон фарсхæцты хуызы. Уыимæ бинонты нымæц гæнæн ис æмæ фæфылдæр уа, уымæн æмæ курдиат бадæттæн ис суанг октябрьмæ – хъусын кæны Уæрæсейы Пенсион фонды цæгатирыстойнаг хайад. Ведомство куыд бамбарын кодта, афтæмæй кæд ныййарджытæ курдиат раздæр радтой, уæд фиддонтæ сæ банчы хыгъдмæ бацæудзысты июлы.
Курдиат чи нæма балæвæрда, уыдонæн æхца бафиддзысты фыццаг фиддоны фæстæ. Уæ зæрдыл уын æрлæууын кæндзыстæм – ацы аз апрелæй фæстæмæ Президенты уынаффæмæ гæсгæ паддзахадон фарсхæцт нæ республикæйы райстой нæуæдз иу мин бинонтæ. Фиддонты иумæйаг бæрц ссис иу миллиард æмæ фондзсæдæ милуан сомы.
Бирæсывæллонджын мад Хуыгаты Агуындæ æвдисы, паддзахадон лæггæдты сайтмæ цы курдиат арвыста, уый. Системæ йыл бакуыста æмæ цалдæр бонмæ фæрæзтæ бацыдысты йæ хыгъдмæ. Хъомыл кæнынц 4 сывæллоны. Се ппæт дæр хауынц – 10 мин сомы райсыны къордмæ. Бинонтæй æрмæстдæр фыд кусы, мад та нырма кæстæримæ хæдзары вæййы, уымæ гæсгæ сын фæрæзтæ стыр æххуыс уыдзысты.
Хибарæй паддзахадон лæггæдтæм курдиат бадæттын кæй бон нæу, уыдонæн та баххуыс кæндзысты бирæвæрсыг центры. 15-æм июнæй фæстæмæ дæрддзæфмæ нал кусынц, сæрмагонд фæткмæ гæсгæ алкæимæ дæр хицæнæй фембæлдзысты. Æцæг хъæуы рагагъоммæ курдиат бадæттын.
Бирæвæрсыг центры курдиæттæ кæд бирæ вæййы, уæддæр сæ афойнадыл бакусынц. Дыккаг хатт 10 мин сомы райсæн уыдзæн æнцондæр. Нал хъæуы ногæй курдиат дæттын. Афтæмæй 3 азæй 16 азы онг сывæллæттæ цы бинонты хъомыл кæны, уыдон июлы дыккаг хатт райсдзысты 10 мин сомы. Курдиат чи нæма балæвæрдта, уыдонæн рæстæг ис 1-æм октябрьмæ. Фиддонтæ æрцæудзысты æфтыд æмæ сæ райсдзысты иумæ
