Ныртæккæ йæ уæнгтæ сты 22 мин адæймаджы республикæйы æппæт районтæй
Патриотизмыл чингуытæй нæй сахуыр кæнæн. Уый рабæрæг вæййы хъуыддæгтæй. Уыцы хъуыды бæлвырдгонд у æвзонг æфсæддонтæн. Ацы змæлд Цæгат Ирыстоны ныридæгæн баиу кодта 22 мин лæппуйы æмæ чызджы. 10 азмæ æнæхъæн фæлтæрæн сси царды æмæ граждайнаг бæрнондзинады скъола. Активисттæн сæ къухы цы æнтыстытæ бафтыд, уыдоныл æрлæууынмæ нæ хъавынц, фæнд кæнынц патриотон куыст дарддæр хæццæ кæнын. Чехойты Фатимæйæн ныхасы бар.
Зонындзинæдтæн сæ сæйрагдæртæй иу – фыццаг медицинон æххуыс бакæнын. Æвзонг æфсæддонтæ ахуыр кæнынц æнæнхъæлæджы цауты рæстæг цыбыр æмгъуыдмæ цæфтæ бабæттын. Сывæллæтты *хсæн Октябрьскæйы скъолайы 9-æм къласы ахуырдзау Нартыхъты Эмилия. Чызг куыд зæгъы, афтæмæй ацы змæлды уæнг суæвын æй бафæндыд, се скъолайы мадзалттæй иуы æвзонг æфсæддонты куы федта, уæд. Эмилия цалдæр азы ахуыр кæны, фыццаг медицинон æххуыс бакæнынæн цы зонын хъæуы, ууыл. Фидæны уыцы зонындзинæдтæ бахъæудзысты, зæгъы чызг.
Æвзонг æфсæддонтæ цардимæ æмдзу кæнынц – ахуыр кæнынц дронтимæ архайыныл: зонгæ кæнынц се стæхыны хицæндзинæдтимæ, ссарынц бæрæггонд бынат, картæтæ æмæ дронты камерæтыл фыст видеоæрмæджытæй пайдагæнгæйæ. Уыцы зонындзинæдтæ сæ бахъæудзысты æрмæст хæстон рæстæджы нæ, фæлæ сабыр царды дæр.
Нырыккон технологитæй адæм кæд активонæй пайда кæнынц, уæддæр бирæ хъуыддæгтæн ивæн нæй. Рæнхъытæй раст цæуын, ахуыргæнæн минæты срæмыгъдтытæ ма руадзын, зонын маршруты æдасдзинад сбæрæг кæнын . Равдыстой сын хæцæнгæрзты макеттæ дæр. «Æвзонг æфсад» Цæгат Ирыстоны фæзынд 10 азы размæ. Ныртæккæ йæ уæнгтæ сты 22 мин адæймаджы республикæйы æппæт районтæй. Регионалон хайады сæрдар Хъайтыхъты Асланы ныхæстæм гæсгæ, ацы азы кæронмæ ма йæ рæнхъытыл хъуамæ бафта 5 мин адæймаджы.
Змæлды уæнгтæ фархайынц республикæйы æппæт æфсæддон патриотон мадзæлтты. Мысæн митингтæ, суанг ма 9-æм майы Парад Уæлахизы боны кадæн Сæрибардзинады фæзы. Ахуыр кæнынц æрмæст коммæ кæсын нæ, фæлæ æххæст сты патриотты миниуджытæй.
