Уыимæ дзы ерыс кодтой районты 7 хуыздæр командæйы. Уæлахиздзаутæ Ирыстоны кад хъахъхъæндзысты Санкт-Петербурджы фестивалы кæронбæттæн къæпхæны.
Æвзонг спортсменты скъолайы арæзт уыд кæртыты футболон командæты бæрæгбон. Уыимæ дзы ерыс кодтой районты 7 хуыздæр командæйы. Уæлахиздзаутæ Ирыстоны кад хъахъхъæндзысты Санкт-Петербурджы фестивалы кæронбæттæн къæпхæны. Парти «Иугонд Уæрæсе»-йы хъæппæрисæй футболон командæты фестиваль арæзт цæуы æппæт Уæрæсейы. Цæгат Ирыстонæй дзы архайдта 500 лæппуйы. Кæй кæрт рамбылдта, æмæ чи ацæудзæн финалон хъæзтытæм, уый тыххæй радзурдзæн Гуытьиаты Алинæ.
Фыццаг бынат бацахсыныл ерыстæ сæ тæмæны сты. Фæзы сæ дæсныдзинад æвдисынц, фынддæс азы кæуыл нæма цæуы, уыцы футболисттæ. Ныртæккæ сæ нысан у иумæйаг — ныхмæлæууæджы дуæрттæм цыфæндыйæдæр хъæуы барвитын пурти. Дыгуры æмæ Алагиры районы командæтæ ерыс кæнынц бронзæ майданыл. Дардæй сæм сæ цæст дарынц тренертæ, сæ хъæлæсыл нæ ауæрдгæйæ сын амонынц уæлахизмæ растдæр фæндаг. Хъазты кæронмæ ма баззад 15 минуты. Уый фæстæ цалдæр пенальтийы æмæ Дигора фæуæлахиз.
Иннæ хъазты та фæзы фембæлдысты финалисттæ. Дзæджыхъæуы «Алани» тох кæны Æрæфы командæимæ. Æртын минуты фæстæ хыгъд байгом кодтой дзæджыхъæуккæгтæ. Дыккаг пурти дæр та барвыста Сакиты Давид. Таймы кæронмæ Æрæфы районы командæйы къухы бафтыд иу гол. Хыгъд ссис дыууæ иу, æмæ хъазты кæронмæ нал аивта. Кæд дыккаг таймы Æрæфы районы командæ равдыста уæлахизмæ тырнынад, уæддæр дзæуджыхъæуггæгтыл нал фæтых сты.
Давидыл æртындæс азы цæуы. Дзæджыхъæуккаг командæйы ныббырсæг йæ цæст дары номдзыд футболист Мессийы цардвæндагмæ. Йæ бæллиц у дунейы раззагдæр командæты хъазын. Давид нымад цæуы спортивон профессионалыл. Турниры уагæвæрдмæ гæсгæ та хъуамæ командæйы дыууæ профессионалон хъазæгæй фылдæр ма уа. Æдæппæтæй финалы уыдис авд командæйы.
Æппæтуæрæсеон футболы фестивалы регионалон къæпхæн нæ республикæйы сарæзтой парти Иугонд Уæрæсейы фарсхæцтæй.
Турниры уæлахиздзаутæ августы кæрон араст уыдзысты Санкт-Петербургмæ. Уым та бæстæйы æмвæзады хъахъхъæндзысты республикæйы кад футболон фестивалы. Ерыстæм æрыгон спортсментæ цæттæ кодтой зæрдиагæй. Сæ фæлтæрддзинад æхсыстой уынгты æмæ кæртыты.
Кæронбæттæн мадзал саив кодтой зарджытæй æмæ кæфтытæй. Кубоктæ æмæ майдантæ финалисттæ райстой номдзыд спортсменты къухæй. Сæ хъастæн сын аргъ скодтой футболон клуб аланийы футболисттæ дæр.
Сбæрæг сты турниры хуыздæр архайджытæ. Æвзонг футболисттæ сæхи равдыстой иттæг хорз. Кæртыты командæты уæнгтæн сæ бæллиц у зындгонд футболисттæ суæвын. Сæйрагдæр та фидæны Уæрæсейы иугонд командæйы кад хъахъхъæнын.
