Егъау мадзал баиу кодта 2 мин сывæллонæй фылдæр Уæрæсейы алы регионтæй æмæ хæстæг фæсарæйнаг бæстæтæй
Æвзонг журналистты скъола «Эрассик»-ы ахуыргæнинæгтæ архайдтой сывæллæтты 2-æм æппæтадæмон культурон форумы Мæскуыйы. Егъау мадзал баиу кодта 2 мин сывæллонæй фылдæр Уæрæсейы алы регионтæй æмæ хæстæг фæсарæйнаг бæстæтæй. Мадзалы уыд алыхуызон секцитæ æмæ тематикон къордтæ. Рæзгæ фæлтæры минæвæрттæ архайдтой цымыдисаг дискусситы, дæсныйадæвдисæг ахуырты. Фæсивæдæн уый уыд ахсджиаг къахдзæф. Райстой дзы хъæздыг фæлтæрддзинад.
Журналисты дæсныйады сусæгдзинæдтимæ нырма ныртæккæ чи райдыдта зонгæ кæнын, ахæм æвзонг лæппутæ æмæ чызджытæ æрæмбырд сты иу бынаты. Абарæн кæмæн нæй, ахæм фæлтæрддзинад райсыны фадат сын ис æвзонг журналистты скъола «Эрассик»-ы. Ацы хатт фæсивæд æрмæг цæттæ кодтой сывæллæтты дыккаг æппæтадæмон культурон форумæй. Арæзт æрцыд Мæскуыйы.
Егъау культурон фæсивæдон мадзал сæмбырд кодта дыууæ мин сывæллонæй фылдæр Уæрæсейы алы регионтæй æмæ хæстæг фæсарæйнаг бæстæтæй. Зæгъæм, Джиоты Данæ форумы архайдта дыккаг хатт. Фæлæ ацы аз куыд дзыллон информацийы фæрæзты минæвар, афтæ.
Лæппутæ æмæ чызджытæ æххæстæй сæхи банкъардтой журналистикæйы дунейы. Форумы сæхæдæг цы федтой, уыдон раргом кодтой телевизормæ кæсджытæн дæр. Дæсныйадæвдисæг ахуыртæ, сфæлдыстадон æрмадзтæ, алыхуызон сесситæ, культурон проекттæ. Ацы æмæ æндæр мадзæлтты фæрцы форумы архайджытæ раргом кодтой сæ хъæппæристæ æмæ сфæлдыстадон программæтæ. Фæлæ сæйрагдæр та – сæ миддунейы æнкъарæнтæ.
Ким æмæ Данæ цæттæ кодтой дайджесттæ. Бæлвырддæр та – форумы рæстæг цы хъуыддæгтæ арæзт цыдысты, уыдоны тыххæй телеравдыстытæ. Зæгъын хъæуы уый, æмæ культурон форумы сæйраг нысан уыд – алы бæстæты курдиатджын фæсивæды иу ран сæмбырд кæнын. «Эрассик»-ы хъомылгæнинæгтæ та ма дзы райстой, аргъ кæмæн нæй, ахæм фæлтæрддзинад.
Касаты Киммæ æмæ Джиоты Данæмæ фидæнмæ ис бирæ фæндтæ æмæ нысантæ. Кæй зæгъын æй хъæуы, баст сты журналистикæимæ. Ацы цæхæрцæст фæсивæдмæ кæсгæйæ, фидарæй уырны, сæ фæндтæ сæ къухы æнæмæнг кæй бафтдзысты, уый.
