Афæдзмæ хæстæг æнæ мыздæй. Беслæны маисон комбинаты кусджытæ разы не сты сæ куысты уавæртæй. Афæдзмæ хæстæг сын нæ фидынц æхца. Уæвгæ, æрмæст уый нæ, куыстуат æдзæллаг уавæрмæ ‘рцыд
Афæдзмæ хæстæг æнæ мыздæй. Беслæны маисон комбинаты кусджытæ разы не сты сæ куысты уавæртæй. Афæдзмæ хæстæг сын
нæ фидынц æхца. Уæвгæ, æрмæст уый нæ, куыстуат æдзæллаг уавæрмæ ‘рцыд,
бæстыхæйттæ сафтид сты. Адæмæн куыд зæгъынц, афтæмæй комбинаты хомаг
нæй, æмæ уый тыххæй нæ кусы, фæлæ æцæгæйдæр уавæры аххосаг цы у, уый зын
зæгъæн у.
Беслæны маисон комбинаты кусджытæ хъаст
кæнынц афæдзмæ хæстæг сын мызд кæй нæ фидынц, уымæй. Куыстуат сæ хæс
дары 20 милуан сомæй фылдæр. Æхца хъуамæ райсой комбинаты 5 сæдæ
кусæджы. Зæгъæм, куыстуаты техник Иринæ Сысоевайæн ацы аз йæ бон йæ
сывæллæтты скъоламæ сæмбырд кæнын нæ бацис. Чингуытæ æмæ йæм дарæсæн
æхца нæ уыд. 11 мæйы мызд нæ райста. Цыппар сæдæ фæндзай адæймаджы
сæмбырд сты, æмæ сæвзæрд уавæры тыххæй дзырдтой сæ хъуыдытæ. Кусджыты
рæстæмбис мызд у 5 мин сомы, æмæ сын уый дæр нæй.
Татраты Январбег йæ цæстытæ доны
разилгæйæ дзуры, фарон кредит кæй райста, æмæ йæ йæ бон фидын кæй нæу,
уый тыххæй. Афтæмæй проценттæ та бонæй-бон фылдæр кæнынц. Ацы цех
февралæй нырмæ нæ кусы. Кæддæр дзы кодтой нартхоры зети æмæ хус
холлæгтæ. Ныр машинæтæ сæхгæдтой хæлуарджыты тынтæй, бæстыхæйттæ сты
афтид. Адæм æрмæст сæ мыздыл нæ тыхсынц, фæлæ æнæхъæн бæстæйыл
хъуыстгонд чи уыд, уыцы куыстуаты фидæныл дæр. Комбинатмæ сæ фылдæр
цæуынц, цы кусæнгæрзтæ ма дзы ис, уыдон дæр цæмæй ма ныххæлæддзаг кæной,
уый тыххæй. Ахæм уавæры аххосаг цы у, уый кусджытæн нæ дзурынц. Не
сфæлдыстадон къорды къухы дæр нæ бафтыд хъуыддаг сбæлвырд кæнын. Æрмæст
комбинаты директор Будайты Олег телефонæй цыбырæй загъта, дыууæ къуыримæ
фарста лыггонд æрцæудзæн, зæгъгæ. Фæлæ кусджыты нæ уырны. Афтæмæй сæ
хъаст бахастой республикæйы прокуратурæмæ. Уым куыд зæгътой, афтæмæй
адæмæн сæ мызд куы нæ бафидой, уæд куыстуаты директор дзуапп дæтдзæн
административон æгъдауæй. Хъуыддагмæ каст цæуы республикæйы хицауады
æмвæзадыл. Агурынц инвестортæ, комбинат йæ къахыл слæууын кæныны тыххæй.
