Стъалытæ фенын æмæ ма суанг, планетарийæ нæ рацæугæйæ, космосмæ балцы ацæуыны фадатæй спайда кодтой нæ республикæйы æмæ сыхаг регионты скъоладзаутæ
Афæдзæй фылдæры размæ республикон планетарийы йæ дуæрттæ байгом кодта Дзæуджыхъæуы космонавтикæйы Скъола. Стъалытæ фенын æмæ ма суанг, планетарийæ нæ рацæугæйæ, космосмæ балцы ацæуыны фадатæй спайда кодтой нæ республикæйы æмæ сыхаг регионты скъоладзаутæ. Экскурсийы рæстæг лæппутæ æмæ чызджытæ базонгæ вæййынц арвы нывтимæ, сæхи аирхæфсынц сæрмагонд тренажерыл, фенынц космикон нау «Апполон»-ы макет. Цæмæй ма æфтауы дисы космонавтикæйы скъола, уый тыххæй радзурдзæн Томайты Батраз.
Арвы тыгъдад æмæ космос басгарын, уыимæ зæххыл уæвгæйæ. Цæмæй сывæллæтты дард стъалытæм æмæ планетæтæм фæхæстæгдæр кæнай, уый тыххæй Къомайты Руслан спайда кодта йæ космикон конструкторы хъæздыг фæлтæрддзинадæй. Планетæты хсæн науы макет байгом кодта ног горизонттæ.
Космонавтикæйы скъола Дзæуджыхъæуы планетарийы байгом фарон. Уыцы мгъуыдмæ йæ бабæрæг кодтой 6 мин скъоладзауы онг. Сæдæ фæндзай лæппуйы æмæ чызджы та ацыдысты космонавтикæйы скъолайы æххæст курс. Æмæ йæ цымыдисдзинад къаддæр нæ кæны. Нырæй фæстæмæ Цæгат Ирыстоны скъоладзаутæн фадат ис сæхи космонавттæй бафæлварынæн. Чи зоны æмæ сæ фидæны исчи сæххæст кæндзæн йæ сабибонты бæллиц. Космосæй дарддæр ма арæх рæзгæ фæлтæрмæ фæзыны наукон-техникон сфæлдыстадмæ цымыдисдзинад.
Алцыдæр – сывæллæтты удæнцойдзинадæн. Къомайты Русланæн ацы ныхæстæ хуымæтæджы не сты, фæлæ йæ царды æмæ сфæлдыстады сæйрагдæр нысан. Дзæуджыхъæуы космонавтикæйы скъолайы саразæг æмæ бындурæвæрæг уыд Лавочкины номыл наукон иугонды специалист, æмæ разамынд лæвæрдта фондз сæдæ космикон аппаратæн. Йæ хъарутæ æмæ фæрæзтæ не вгъау кæны, цæмæй сывæллæттæн байгом кæна ногдзинæдты æмæ техникон сфæлдыстады цымыдисаг дунемæ дуар.
Сæрдыгон Дзæуджыхъæуы æмæ республикæйы районты скъоладзаутæн космонавтикæйы Скъолайы арæзт фæцæуынц экскурситæ æмæ ма сын равдисынц тематикон кинонывтæ дæр. Программæ кусдзæн каникулты рæстæг. Фæлæ сын космосы дунеимæ зонгæ кæныны фадат уыдзæн афæдзы дæргъы дæр.
